Կառավարությունը վերաբաշխում է ՀԷԿ-երի կառուցումը

Այսօր կառավարության նիստում ՀՀ վարչապետ Կարեն Կարապետյանը հանձնարարել է թարմացնել ջրամբարների կառավարման պլանները, եռամսյա ժամկետում մշակել ջրամբարների բալանսի մեթոդաբանությունը և հաշվի առնել շրջակա միջավայրի ու գյուղատնտեսության պահանջմունքները:

Բացի այդ, պետք է մինչև 2017թ. դեկտեմբերի 31-ը պետք է վերանայել ջրամբարների կառվարաման պլանի մասին 2011թ. կարգը և համապատասխանեցնել ներկայացված պահանջներին։

Բացի այդ, վարչապետը հանձնարարել է նաև կարգավորել փոքր ՀԷԿ-երի ոլորտը։

Նա նաև նշել է, որ օրենսդրական, տեխնիկական և ինստիտուցիոնալ անբավարար կարգավորումների պատճառով փոքր ՀԷԿ-երը ներկայումս զգալի բացասական ազդեցություն են թողնում ինչպես շրջակա միջավայրի, այնպես էլ սոցիալական և տնտեսական երկարաժամկետ զարգացումների վրա:

Երևի թե վարչապետը տեղյակ չէ, որ ջրամբարները, նաև Սևանա լիճը, ուղիղ կապված են ՀԷԿ-երի շահագործման հետ․ շատ գետերի վրա, որոնք սկիզբ են առնում ջրամբարներից, փոքր ՀԷԿ-եր են կառուցված, որոնք ոչ գյուղատնտեսական սեզոնին ջուր են բաց թողնում՝ միայն ՀԷԿ-եր շահագործելու համար, իսկ գյուղատնտեսությունը երկրորդ պլանում է, ասել կուզի՝ ջրամբարների ջուրն օգտագործվում է ոչ նպատակային։

Բացի այդ, կառավարության որոշմամբ, պետք էր Սևան թափվող գետերի վրա արգելել փոքր ՀԷԿ-երի կառուցումը, սակայն, ինչպես հայտնի է, այս դրույթը ևս չի պահպանվել․ լիճ թափվող գետերի վրա ՀԷԿ-երի թույլտվություններ տվեցին, որից հետո որոշեցին արգելել ՀԷԿ-երի կառուցում, իսկ թույլտվությունները մնացին ուժի մեջ։

ՀԷԿ-երի կառուցումը հիմնականում ավարտվել է, կան նաև կառուցվելիք ՀԷԿ-երի թույլտվություններ, և կառավարությունը կրկին նախատեսում է կատարել այն, ինչ-որ նախկինում արդեն արվել էր՝ կիսատ-պռատ։

Բացի այդ, կառավարությունը մտադրվել է նաև հստակեցնել գետերի ցանկը, որտեղ բնապահպանական, գյուղատնտեսական և այլ առանձնահատկություններից ելնելով՝ արգելվում է ՀԷԿ-երի կառուցումը, ինչպես նաև մշակել ձկնուղիների կառուցման և աստիճանների բարձրության նորմեր:

Կարելի է միայն հուսալ, որ ջրային ոլորտում վերաբաշխումներ չեն կատարվելու, այն է՝ եթե նախկինում փոքր ՀԷԿ-երը արտոնություն էր, ապա այդ արտոնությունը տրամադրել այլ անձանց՝ բնապահպանական կամ այլ պատճառաբանություններով։