Վահրամ Բաղդասարյանը չգիտի՞, որ ընտրակաշառքը պոզով-պոչով չի լինում (ֆոտո, վիդեո)

Վերջերս Հանրապետական կուսակցության վառ ներկայացուցիչներ Էդուարդ Շարմազանովը, իսկ ավելի ուշ ԱԺ նախագահ Գալուստ Սահակյանը ու նաև հենց ինքը՝ ԱԺ Հանրապետական խմբակցության ղեկավար Վահրամ Բաղդասարյանը ճակատները բաց հայտարարում էին, թե ընտրակաշառք բաժանող չկա:

Եթե տեսնե՛ք՝ ցո՛ւյց տվեք…

Մասնավորապես, Վահրամ Բաղդասարյանը նշել է, թե՝ «Բոլորին խնդրում եմ, եթե կլինեն նմանատիպ առաջարկություններ (նկատի ունի ընտրակաշառք), թող վերցնեն և հայտնեն լրատվությանը: Ես կատեգորիկ դեմ եմ նման երևույթներին… չեմ բացառում, որ կլինեն այդպիսի փորձեր, մենք բազմիցս խոսել ենք արջի ծառայությունների մասին, բարձրաձայնեք և դուք դրա արձագանքը կտեսնեք»:

Իհարկե, հատկապես Հանրապետականների մոտ ընտրակաշառքը ժողովրդին մատուցելը և ջրից չոր դուրս գալը հեշտ է: Չարաշահելով իրենց դիրքն ու պաշտոնը, քանի որ բոլորն էլ պաշտոնյաներ են, նրանք կարող են, ասենք, շենքի դուռ սարքել, ճանապարհահատված վերանորոգել կամ էլ աշխատավարձ բարձրացնել ու էլի նման անմեղ թվացող բաներ:

Այս ամենին էլ եկավ համալրեց կանանց միամսյակը:

Ա՛յ քեզ հաջողությո՜ւն:

Վահրամ Բաղդասարյանը Մարտի 8-ի երեկոյան՝ որպես քարոզարշավ, հանդիպում է կազմակերպել ու նվերներ բաժանել բոլոր կանանց: Իհարկե, նվերները դիտվել են ոչ թե որպես ընտրակաշառք, այլ որպես ուշադրություն՝ Կանանց տոնի առիթով:

Այստեղ ամեն ինչ նորմալ է, միայն մի հարց է հուզում՝ ինչո՞ւ Վահրամ Բաղդասարյանը մինչ այս չէր հիշում, որ այդ տարածքում կանայք են ապրում, ու նրանք ունեն տոն, որի առթիվ կարելի է շնորհավորել կանանց, բաժակ-բաժակի տալ նրանց հետ և փաթեթավորված նվերներ բաժանել:

Ստացվում է, որ նա, ով ընտրակաշառքը որակում էր որպես արջի ծառայություն,

ինքն է արջի ծառայություն մատուցողը:

nverner nverner1 nverner2 nverner3