ՀՀԿ-ի խաղադրույքը․ Արփինե Հովհաննիսյանի թախծոտ աչքերը, պոչից` Վիգեն Սարգսյանն ու Տարոն Մարգարյանը

ՀՀԿ ռեյտինգային ցուցակի առաջին տեղում Պաշտպանության նախարար Վիգեն Սարգսյանն է, երկրորդում՝ Երևանի քաղաքապետ Տարոն Մարգարյանը, երրորդում՝ արդարադատության նախարար Արփինե Հովհաննիսյանը, քարոզարշավը ղեկավարում է վարչապետ Կարեն Կարապետյանը։

Նշենք, որ ՀՀԿ ցուցակը, ինչպես էլ շուռ տաս, տակից միլիոնատերեր են դուրս գալիս և եթե նրանք ժողովրդի հետ են, ժողովրդի համար են, ինչպես սիրում են կրկնել, ապա…

ինչո՞ւ ժողովրդի նման չեն ապրում․ նվազագույն՝ 55 հազար դրամ

աշխատավարձից մինչև համեստ աշխատավարձ։

Բնակվում են ոչ թե բնակարանում կամ սեփական համեստ տանը, այլ մեծ առանձնատներում կամ բազմասենյականոց բնակարաններում, ունեն անդրքաղաքային մեկ կամ մի քանի սեփական վիլլա, ծանրակշիռ գումարներ բանկերում։ Իհարկե, վարչապետին դժվար է մեղադրել հանպատրաստից հարստանալու կամ «բիրդանաղա» լինելու համար, սակայն մնացածների պարագայում…

Եվ նման հետաքրքիր առանձնախմբով գնում են ԱԺ ընտրությունների։

Վարչապետը, ով, ի դեպ, այս տարի չավելացրեց աշխատավարձերը, նաև «Գազպրոմ-Արմենիայի» ֆոկուսների այս կամ այն կերպ պատասխանատուն է, որոշել է փրկել ՀՀԿ-ին՝ իհարկե, ոչ Սերժ Սարգսյանի կամ այլոց, այլ Կարեն Կարապետյանի համար։

ՀՀԿ-ի տանիքի տակ հավաքվածներն ունեն մեկ նպատակ՝ իշխանությունը պահել ամեն կերպ, իսկ դրա համար կարելի է անգամ Կարեն Կարապետյանին դարձնել քարոզարշավի ղեկավար։

Նրանից բացի, այլ խարիզմատիկ և չվարկաբեկված թեկնածու ՀՀԿ-ն չունի։

Ինչ վերաբերում է Արփինե Հովհաննիսյանին, ապա նրա «մեղքերը», կարծես թե, ակնառու չեն, ապրում է իր համար, աշխատում, ի տարբերություն ՀՀԿ շատ տիկնանց՝ խելացի է, ինչի վրա էլ դրվել է ՀՀԿ-ի խաղագումարը։ Իհարկե, կուսակցությունում ոչ թե գերվել են Հովհաննիսյանի գեղեցիկ աչքերով, այլ հասկանում են, որ տխմարության մակարդակն էլ սահման ունի, գուցե հանրությունը խաբվի գեղեցիկ աչքերին, գուցե, ո՞վ գիտե։

Երկրորդ՝ պատվավոր տեղը, որքան էլ զարմանալի է, զբաղեցնում է Երևանի քաղաքապետ Տարոն Մարգարյանը, ոչ՝ Արմեն Աշոտյանը։

Ի դեպ, Տարոն Մարգարյանը, երբ Ավանի թաղապետն էր, ավանցիները սիրով էին խոսում նրա մասին, սակայն քչերը գիտեին, թե հենց Ավանում այն տարիներին նա ինչ օբյեկտներ ուներ, որոնք անգամ մայթերն էին օգտագործում անձնական նպատակներով, իսկ երթուղային տաքսիները և տաքսի ծառայություններն Ավանի անբաժան մասն էին․ իհարկե, երթուղայինները շատ վատ էին աշխատում։

Իսկ այժմ էլ, Երևանի քաղաքապետի պաշտոնում լինելով՝ կարելի է մամուլում հանդիպել քաղաքապետարանի ուռճացված ծախսերի, անիմաստ միջոցառումների, թանկարժեք գնումների և այլն։ Ի դեպ, հանրության հետ հանդիպումների ժամանակ, եթե իհարկե, նման հանդիպումներ լինում են, նրան հնարավոր չէ մոտենալ կամ «խոսեցնել», նա չի կարողանում շփվել մարդկանց հետ։

Իսկ քաղաքապետարանի աշխատակիցները մշտապես հայտնվում են սկանդալների մեջ։

ՀՀԿ առաջին երկու թեկնածուները՝ Տարոն Մարգարյանը և Վիգեն Սարգսյանը բանակում չեն ծառայել՝ օգտվելով իրենց կապերից և հնարավորություններից:

Իսկ այսօր հայրենասերներ և երկրի համար անհանգստացողի դեր են ստանձնե՞լ։ Այդպես լինո՞ւմ է։

Ինչ վերաբերում է վերջերս Պաշտպանության նախարար արթնացած Վիգեն Սարգսյանին, ապա նա ողջ գիտակացական կյանքում աշխատել է կա′մ ՀՀ նախագահի մոտ, կա′մ նրանից ոչ հեռու և համարվում է իշխանական կատարյալ կերպար։

Տարոն Մարգարյանը և Վիգեն Սարգսյանն առանձնանում են իրենց պատկառելի-անսկզբնաղբյուր հարստությամբ։

Իհարկե, ՀՀԿ-ի ամբողջովին հենվում է Կարեն Կարապետյանի վրա, ով թարմ դեմք է, էապես տարբերվում է օլիգարխիկ հայաստանյան վարկաբերկված կերպարներից:

 Իսկ քարոզարշավը լրացնում են Արփինե Հովհաննիսյանի թախծոտ աչքերը․

Տարոն Մարգարյանը և Վիգեն Սարգսյանը՝ պոչից։

NEWSPRESS.am