Նախարարն իր հարմարավետ բազմոցին նստած՝ թքած ունի ճանապարհների վրա (տեսանյութեր)

Թեև Արտակարգ իրավիճակների նախարարությունը տեղեկացրել է, որ «ՀՀ տարածքում կան դժվարանցանելի ավտոճանապարհներ», որ «որոշ ավտոճանապարհներին տեղ-տեղ առկա է մերկասառույց, մառախուղ», «ձյուն է տեղում» վերջապես, սակայն ՀՀ տրանսպորտի և կապի նախարարությունը, կարծես, թքած ունի այդ ամենի վրա:

Չկան ո′չ ձնամաքրման մեքենաներ, ո′չ որևէ մի նշույլ, որը ցույց կտա, որ ինչ-որ մեկն, այնուամենայիվ, անհանգստացած է ճանապարհների սառած վիճակի համար:

Եթե ՀՀ տրանսպորտի և կապի նախարարությունն սպասում է անպայման գրանցվի մի դժբախտ պատահար և հետո նոր միայն արձագանքի, ապա տեղեկացնում ենք, որ NEWSPRESS.am-ի հիմնադիր-տնօրեն Արիանա Հովսեփյանը քիչ առաջ Սևան-Հրազդան ավտոճանապարհին ձյունառատ ճանապարհի հետևանքով հազիվ է փրկվել ավտովթարից:

Թե՞ անպայման հարկավոր է զոհ լինի, որ վերջապես նախարարությունն զբաղվի իր գործով:

Իհարկե, հասկանում ենք, որ աշխատանքային ժամն ավարտվել է, սակայն նախարար Վահան Մարտիրոսյանը տուն գնալուց և իր հարմարավետ բազմոցին պառկելուց առաջ գոնե ձնամաքրման աշխատանքների հետ կապված համապատասխան հանձնարարականներ տար, հատկապես որ՝ դեռ երեկվանից զգուշացվում էր սպասվելիք տեղումների մասին:

Իսկ թե «տեղյակ չէ» ճանապարհների խայտառակ վիճակի մասին, մեծահոգաբար ցուցադրում ենք մի քանի տեսանյութ, որտեղ պարզ երևում է, թե ինչ վիճակում է գտնվում Սևան-Հրազդան ավտոճանապարհը:

Ի դեպ, տեսանյութերն արված են 18:30-ի դրությամբ, իսկ ձյունը շարունակում է տեղալ…