Հիմա արդեն կոնկրետ անուններ պարզելու ժամանակն է. Հաց բերողի փաստաբան

Արթուր Սարգսյանի՝ Հաց բերողի փաստաբան Տիգրան Եգորյանը ֆեյսբուքյան իր էջում գրել է.

«Այս պահի դրությամբ շատ մանրամասներ չեմ կարող հրապարակել, հայտնում ենք հետևյալը.

Արթուր Սարգսյանի պաշտպանները պահանջել են գլխավոր դատախազից, որ «Սասնա Ծռեր» խմբի գործով քննչական խմբի ղեկավար Էդ. Հակոբյանին և Արթուրի գործով անմիջական մասնակցություն ունեցած բոլոր քննիչներին մեկուսացնեն Արթուր Սարգսյանի գործով որևէ գործողության կատարումից կամ դրա վրա ազդեցությունից:

Հաղորդում է ներկայացվել գլխավոր դատախազին՝ Արթուր Սարգսյանի նկատմամբ խոշտանգում և անմարդկային վերաբերմունք դրսևորելու հիմքով քրեական հետապնդում հարուցելու և պատասխանատվության ենթարկելու սույն գործով անմիջականորեն զբաղված քննչական խմբի ղեկավարին և այլ քննիչներին, Արթուրի կալանքը հաստատած դատավորների, ինչպես նաև ՔԿՀ համակարգում Արթուրին անհրաժեշտ խնամք չապահոված բոլոր անձանց նկատմամբ: Այս գործի քննությամբ ՀՔԾ-ն չպետք է զբաղվի:

Միաժամանակ, մենք միջնորդել ենք, որպեսզի Արթուրի դիակի դատաբժշկական փորձաքննությանն անմիջապես մասնակից դարձվեն միջազգային անկախ դատաբժիշկ փորձագետներ, իսկ մարմնի բոլոր հյուսվածքները հետազոտվեն և դրանցից նմուշներ վերցվեն և տրամադրվեն՝ դրանք անհրաժեշտության դեպքում այլ փորձագետների կողմից ուսումնասիրվելու համար: Պահանջել ենք նաև, որ դատաբժշկական փորձաքննության ողջ ընթացքը տեսաձայնագրվի և դրա օրինակը՝ Արթուրի առողջության վերաբերյալ բոլոր հնարավոր փաստաթղթերի հետ մեկտեղ հանձնել մեզ:

Մենք տարակուսում ենք, որ որոշ բժիշկներ արդեն իսկ հրապարակային հայտարարություններ են կատարել այն մասին, որ Արթուրի մահը կապ չունի իր կալանքի և դրա պայմանների հետ, առանց համապատասխան իրավասու ատյանների կողմից համապատասխան եզրահանգումներին սպասելու: Սա ուղղակիորեն մատնանշում է, որ իշխանությունները ցայտնոտի մեջ փորձում են հանրության ուշադրությունը շեղել քննության ենթակա հիմնական հարցերից:

Արթուր Սարգսյանին անմարդկային վերաբերմունքի և խոշտանգումների ենթարկելով ամբողջ պատասխանատվությունը կրում է պետական ողջ իրավապահ, արդարադատության և քրեակատարողական համակարգը, որի մասին մենք բազմիցս բարձրաձայնել ենք: Բայց հիմա արդեն կոնկրետ անուններ և անհատական պատասխանատվությունը պարզելու ժամանակն է: