Որտե՞ղ է թաքնված շան գլուխը. Գյուղնախի մութ խաղերը

Այս տարի ՀՀ գյուղատնտեսության նախարարությունը պարարտանյութերի մատակարարման մրցույթ էր հայտարարել, որտեղ հաղթող է ճանաչվել նվազագույն գնային առաջարկ ներկայացրած 3 ընկերություն. Մասիսի «Բերրիություն», ռուսական «Տորգովիյ դոմ Դոնսկոյ Ագրոխիմցենտր» և իրանական պարարտանյութ ներմուծող «Բարան գրուպ» ընկերությունները:

Սակայն, ավելի ուշ՝ փետրվարի 23-ին, «Բարան գրուպ»-ը (որն զբաղեցնում էր 3-րդ տեղը) փոխել է մտադրությունը և հրաժարվել մատակարարի իր պարտավորություններից:

Տրամաբանական է, որ նրա լոտերը (մարզերը) Գյուղատնտեսության նախարարությունը պետք է տար նրան հաջորդող այն կազմակերպությանը, որն ավելի մատչելի գին է առաջարկել:

NEWSPRESS.am-ի հավաստի աղբյուրների համաձայն՝ «Բարան գրուպ»-ը մեկ պարկ պարարտանյութի դիմաց առաջարկել է 7000 դրամ, իսկ նրան հաջորդող մեկ այլ կազմակերպություն՝ 6990 դրամ:

Ու չնայած դրան՝ Գյուղատնտեսության նախարարությունը մերժել է այդ ընկերությանը, որն, ի դեպ, ներկայացրել է բավականին շահավետ առաջարկ:

Մեր հավաստի աղբյուրների համաձայն՝ փոխնախարար Աշոտ Հարությունյանը նույնիսկ բանակցել է հիշյալ ընկերության հետ, որի նախնական փուլում վերջինիս առաջարկել է ներկրել պարարտանյութը:

Սակայն հանկարծ փոխել է իր մտադրությունն ու ինչ-ինչ պատճառներով հրաժարվել պայմանավորվածությունից՝ առանց որևէ բացատրության:

Սա այն դեպքում, երբ վարչապետ Կարեն Կարապետյանը պարարտանյութի ներկրման հետ կապված հատուկ հանձնարարականներ է տվել և հորդորել լինել խիստ հետևողական ու ամեն ինչ անել, որ գյուղացին հանկարծ չտուժի: Այսինքն՝ ստացվում է, որ գործադիրը մի ձեռքով խփում է սեղանին՝ կոչ անելով հողօգտագործողներին մատչելի գնով անհրաժեշտ պարարտանյութերի ձեռքբերման հարցում աջակցել, մյուս ձեռքով խոչընդոտում է հողերի արդյունավետ օգտագործմանն ու գյուղատնտեսական մթերքների արտադրության ծավալներն ավելացմանը, ինչը կարող է բարձրացնել գյուղացիական տնտեսությունների եկամուտները:

Ավելի պարզ ձևակերպմամբ՝ Գյուղնախարարությունն անտեսում է իր վերադասի՝ վարչապետի հանձնարարականը և իր ղեկը պտտում իր ուզած ճանապարհով:

Հասկանալու համար, թե ինչ զարտուղի ճանապարհով է փորձում իր գործերն առաջ տանել նախարարությունը, և, ի վերջո, ինչ խնդիրներ կան նախարարության փակ դռների հետևում, փորձեցինք կապ հաստատել հենց փոխնախարար Աշոտ Հարությունյանի հետ: Նա տեղում չէր, իսկ օգնականը հորդորեց, որ անմիջապես հենց փոխնախարարի հետ կապ հաստատենք, քանի որ ինքն իրավասու չէ պատասխանել հարցին:

Աշոտ Հարությունյանն էլ, իմանալով, որ իրեն զանգահարում է լրատվության աշխատակից՝ նախ մեծահոգաբար լսեց հարցը մինչև վերջ, ապա հորդորեց զանգահարել նախարարության հասարակայնության և լրատվության հետ կապերի բաժնի պատասխանատուին: Դիտարկմանը, որ նախարարությունից արդեն ինձ հորդորել են թեմայի շուրջ խոսել հենց իր հետ, նա շփոթվեց, ապա արձագանքեց. «Հա, բայց ո՞վ, ո՞վ ա ասել, որ ինձ զանգեք, ես փողոցում եմ, ոչ մի բան չեմ լսում, ա՛յ, հիմա Դուք խոսում եք, ես հազիվ եմ լսում, ալո, ալո… չեմ լսում…»,- ասաց և անջատեց հեռախոսը:

Նախարարության հասարակայնության և լրատվության հետ կապերի բաժնից էլ մեզ նախ ասացին, որ սպասենք իրենց զանգին, ապա քիչ ավելի ուշ զանգահարելով՝ ասացին, որ համաձայնեցրել են Աշոտ Հարությունյանի հետ և հայտնեցին, որ նա կարող է թեմայի շուրջ հարցազրույցի համար հանդիպել՝ ոչ շուտ, քան երկուշաբթի:

«Իսկ այսօր գոնե հեռախոսազրույց չե՞ք կարող կազմակերպել» հարցին՝ հնչեց ոչ այնքան տրամաբանական պատասխան. «Աշոտ Հարությունյանը հիմա խորհրդակցության է, չի կարող»: Սա այն դեպքում, երբ նա ընդամենը մի քանի րոպե առաջ փողոցում էր:

Բայց ժամանակից առաջ չընկնեք և չփորձենք ենթադրություններով առաջնորդվել, պարզապես հուսանք, որ մեզ հուզող հարցերի պատասխաններ իսկապես կստանանք երկուշաբթի օրը:

NEWSPRESS.am-ը հետևողական կլինի պարզելու, թե որտեղ է նախարարությունը թաքցրել շան գլուխը:

Արմինե Մկրտումյան