ՀՀԿ-ի ձայների ուժը, գեներալի թափն ու շանտաժը

Այսօր` մարտի 22-ին, Արմավիրի մարզի Շահումյան թռնչաֆաբրիկա համայնքի արդեն նախկին ղեկավար Արթուր Յայլոյանի հերթական դատական նիստն է: Նա հայտնվել է դատարանում խոշոր չափերի գումար հափշտակելու մեղադրանքով:

Հիշեցնենք, որ ըստ նրա մեղադրական եզրակացության՝ 2000թ.-ից համայնքի ղեկավարի պաշտոնը զբաղեցնող Յայլոյանը 2008-2016թթ. ընթացքում իր կնոջը և սոցիալապես վատ պայմաններում ապրող մի քանի բնակչի հրամանագրել է իրականում չգործող՝ գրադարանավարուհու, այգեպանի և գործավարի հաստիքների վրա` նրանց անվամբ գյուղապետարանի բյուջեից դուրս գրելով համապատասխան չափի աշխատավարձեր և տնօրինել իր հայեցողությամբ: Ընդհանուր առմամբ, նրա թեթև ձեռքի շնորհիվ, համայնքի բյուջեից դուրս է գրվել մոտ 8մլն դրամ: Սա նշանակում է, որ համայնքի բյուջեն այդ չափի վնաս է կրել:

Բացի այդ, նա դիմել է նաև այլ կեղծարարության: Չարաշահելով իր դիրքը՝ Արթուր Յայլոյանը կեղծել է ավագանու անդամ Հակոբ Դանիելյանի ստորագրությունը և շրջանառության մեջ է դրել իրավունք վերապահող պաշտոնական փաստաթղթեր` ավագանու որոշումներ, կատարողական ակտեր:

Սա այն դեպքում, երբ իրականում 2015թ. սեպտեմբերից ավագանու հիշյալ անդամը բացակայել է Հանրապետությունից:

Ու չնայած Շահումյան թռչնաֆաբրիկա համայնքի գյուղապետին մեղադրանք է առաջադրվել Քրեական օրենսգրքի համապատասխան հոդվածների մի քանի կետով, սակայն, վերջինս գտնվում է ազատության մեջ, և նրա նկատմամբ խափանման միջոց է ընտրվել ստորագրությամբ երկրից չհեռանալու պայմանը:

NEWSPRESS.am-ի աղբյուրների համաձայն՝ Յայլոյանի դատական գործում իշխող կուսակցության մատը խառն է, և վերջին խոսքը նրանն է լինելու:

Մեր աղբյուրների համաձայն՝ Հանրապետականից Յայլոյանի առաջ թիվ են դրել ու ժամանակ տվել, եթե իրենց համար ձայներ բերեց՝ դատական գործը կկոծկեն, կգնա:

Այս և և դատական գործի ընթացքի մասին տեղեկություններ իմանալու համար NEWSPRESS.am-ը կապ հաստատեց Արթուր Յայլոյանի հետ:

Նա նախ անմիջապես չընկալեց ով է զանգահարում.

-Ասում եք որտեղի՞ց:

-NEWSPRESS.am լրատվական կայքից:

-Պռե՞սս-ից:

-Ո՛չ, NEWSPRESS.am:

-Էդ ի՞նչ ա եղել,- հարցրեց նա, այնուհետև լսելով հարցը` ասաց.- Չեմ լսում, աղջի′կ ջան:

Հարցը կրկին լսելուց հետո, դարձյալ ասաց.

-Ախր հեչ չի լսվում, այ:

-Պարո՛ն, Յայլոյան, ես Ձեզ լավ եմ լսում, ուզո՞ւմ եք նորից զանգեմ:

-Չէ՛, լավ, ասե՛ք, լսում եմ…

Նա մեզ հետ զրույցում չհերքեց, որ Հանրապետականի համար ձայներ է բերելու, բայց միևնույն ժամանակ նկատեց, որ իր և ՀՀԿ-ի միջև պայմանավորվածություն չկա:

-Ես միանշանակ ձայներ եմ տալու ՀՀԿ-ին, բա ոնց, ես Հանրապետական եմ, բայց ասողները չարաչար սխալվում են, թե Հանրապետականը կօգնի ինձ դատական հարցում: Ոչ մի նման բան…,- ասաց մեր զրուցակիցը:

Պատասխանելով դիտարկմանը, որ իր թիկունքում կանգնած մարդկանց մեջ հիշատակվում է նաև գեներալ Սեյրան Սարոյանի անունը, նա ասաց.

-Չէ՜, ի՞նչ եք ասում, էդ ասողը շատ բանա անում, ինձ շանտաժ են անում… գեներալը մեր գեներալն ա եղել, բայց դատերի հարցով տեղյակ չէր ու չի զբաղվել էդ գործով,- ասաց նա ու հավելեց,- աղջիկ ջան, լսի, ինձ շանտաժ են անում, ըտենց դեպք չի եղել, որ ես Հանրապետականի հետ պայմանավորվեմ:

Շանտաժը, Յայլոյանի պատկերացմամբ, հերյուրանքներն են, այսինքն՝ խոսակցություններն այն մասին, որ իր ծառայությունների դիմաց ՀՀԿ-ն կմիջամտի դատական գորիծին: Ամեն դեպքում գործը դեռևս քննվում է Արմավիրի մարզի ընդհանուր իրավասության դատարանում և, եթե Յայլոյանին հաջողվեց, քվեների հաշվին անվնաս դուրս պրծնել իր վրա կուտակված հոդվածների բլուրի միջից՝ կարելի է ենթադրել, որ, այնուամենայնիվ, իշխող կուսակցության մատը խառն է: