«Ծառուկյան» դաշինքը հերքում է

Գագիկ Ծառուկյանի մամլո քարտուղար, «Կենտրոն» հեռուստաընկերության տնօրեն Իվետա Տոնոյանը հերքել է մամուլում շրջանառվող այն տեղեկատվությունը, թե իբր պայմանավորվածություն է ձեռք բերվել «Ծառուկյան» դաշինքի և ՀՀԿ-ի միջև ձայների փոխանցման վերաբերյալ:

Նա ֆեյսբուքյան իր էջում գրել է, որ «Հրապարակ» թերթի այդ տեղեկատվությունը բացարձակ սուտ է և անգամ նվազագույն առնչություն չունի իրականության հետ:

«Հրապարակման մեջ իրականությանը համապատասխանող միակ նախադասությունն այն է, որ իսկապես օրեցօր «Ծառուկյան» դաշինքի վարկանիշը շարունակական աճ է արձանագրում: Իսկ մնացյալ տեղեկատվությունը կատարյալ հերյուրանք է: Վստահ եմ, որ ինչպես Ծառուկյան դաշինքի, այնպես էլ ընտրապայքարին մասնակցող մյուս բոլոր քաղաքական ուժերի ներկայացուցիչները, հանձնաժողովի անդամները, վստահված անձինք տեր են կանգնելու իրենց օգտին տրված յուրաքանչյուր քվեին և թույլ չեն տալու որևէ ընտրական մանևրում: Եվս մեկ անգամ նմանատիպ ստահոդ ինֆորմացիոն հոսքերի հեղինակներին կոչ ենք անում զսպել չեղած երևույթները իրականի տեղ սղացնելու անհագուրդ ցանկությունը և առաջնորդվել մասնագիտական ու մարդկային սկզբունքներով, եթե այդպիսիք իհարկե դեռ կան: Պարոն Ծառուկյանի կողմից մշտապես բարձրացայնված՝ լրատվամիջոցների կողմից մարդկանց շարունակաբար թյուրիմացության մեջ գցելու ծանոթ գործելաոճը ի վերջո պետք է դադարեցվի, քանի որ այս ամենն արվում է մեր երկրում ապրող բոլոր քաղաքացիների, այդ թվում նաև նմանատիպ հրապարակումների հեղինակների համար»,- գրել է Իվետա Տոնոյանը:

Հիշեցնենք, որ մամուլում շրջանառվող լուրերի համաձայն՝ ՀՀԿ-ն թույլ չի տալու «Ծառուկյան» դաշինքին տեր կանգնել իր քվեներին։ Տեսնելով Ծառուկյանի օրեցօր աճող վարկանիշը՝ Ծառուկյան-Սարգսյան վերջին հանդիպման ընթացքում պայմանավորվածություն է ձեռք բերվել, որ Ծառուկյանին տրվի իր «հասանելիքը», իսկ մնացած ձայները փոխանցվեն ՀՀԿ-ին։

Նման հրահանգ է իջեցվել մարզային ընտրական հանձնաժողովների ՀՀԿ-ԲՀԿ անդամներին․ եթե հաշվարկի ընթացքում լիմիտն սպառվի, «Ծառուկյան» դաշինքի քվեները դրվելու են ՀՀԿ-ի տարածքի վրա։ Թե քանի տոկոս է կազմում լիմիտը, «Հրապարակ»-ի զրուցակիցը չցանկացավ բացահայտել»: