Կարեն Ավագյանը նաև որպես «խավարասեր»

ՀՀԿ-ի «պատվերով» ելույթ ունեցող, ՀՀԿ-ի «մեսինջեռ», ՀՀԿ-ի «մանկլավիկ», ՀՀԿ-ի հավերժ «ջահել» և ի վերջո՝ «փուչիկ» Կարեն Ավագյանը, ինչպես և կարելի էր սպասել, այսպես ասած՝ որքան գետնի երեսին է՝ երկու այնքան էլ գետնի տակ է:

Մինչ հանրապետականներն իրենց կարգախոսին համահունչ հարայ-հրոցով ու հրմշտոցով «առաջ են ընթանում» դեպի «իրենց անվտանգություն»՝ իր «դիրքերն» ապահոված ու ցուցակի պատվավոր 10-նյակում հայտնված Կարեն Ավագյանը ապահովում է նաև իր բարեկեցիկ ծերություը (դե հո հավերժ ջահել չի՞ մնալու, պետք է մի քիչ էլ մտածի վաղվա օրվա մասին):

Բայց իր տակը կեղտոտ ճանապարհով դիզելու և միաժամանակ այդ կեղտից մաքուր դուրս գալու համար, նա չի հետևել սովորական դարձած օրինակին: Իր ունեցվածքը բարեկամների անունով գրելու տարբերակի փոխարեն նա ընտրել է հակառակ ձևաչափը՝ բարեկամի, իսկ ավելի կոնկրետ մորաքրոջ տղայի անունից կլորիկ գումար է նվիրատվություն արել իրեն՝ 80 հազար ԱՄՆ դոլար:

Նվիրատվություն անող 25-ամյա Խաչիկ Զաքարյանը «Հայաստանի երիտասարդական հիմնադրամ»-ի (ՀԵՀ) «սոցիալ-տնտեսական և զբաղվածության ծրագրերի» համակարգողն է:
Նա «ՀԵՏՔ»-ի հարցմանն ուղարկված պատասխանում նշել է, որ գումարը նվիրել է նոտարով վավերացված նվիրատվության պայմանագրով։ «Նվիրատվությունը կատարել եմ իմ անձնական խնայողություններից։ Նվիրատվությունը որևէ ուղղակի կամ անուղղակի կապ Հայաստանի երիտասարդական հիմնադրամի հետ չունի»:

Անկեղծ և իրատես լինելու համար պետք է նկատել, որ 25-ամյա երիտասարդը հազիվ թե կարողանար այդչափ խնայողություններ անել, ու դեռ մի բան էլ՝ իր հալալ քրտինքով վաստակածից «լավություն» աներ կրակի մեջ ընկած ու անեծքներից հետապնդվող եղբորը:

Երևի ավելի  հավանական կհնչեր, եթե նա ասեր, թե խոշոր շահում է ունեցել և կամ էլ հսկայական ժառանգություն ստացել, որից ցանկացել է մասնաբաժին հանել իր ոչ այնքան հարազատ արյունակցին:

Ու թեև Ավագյանի, այսպես կոչված, բարերար եղբայրը կցկտուր, լղոզված ու ոչինչ չասող բացատրություն է տվել, իսկ Կարենն ընդհանրապես չի փորձում որևէ կերպ արձագանքել, այնուամենայնիվ ոչ-ոք ապուշ չէ, և բոլորը գիտեն, որ Կարեն Ավագյանի ղեկավարած «ՀԵՀ»-ն մեծ դրամաշնորհներ է ստանում կառավարությունից, ինչի շնորհիվ էլ հենց աճում է նաև նրա սեփական ունեցվածքը։

Ու որքան էլ նա իր պայծառ, ջինջ ու թափանցիկ աչքերով  և մարդկային կերպարանքով առերես հանդես գա իր հակակոռուպցիոն ու թափանցիկ աշխատանքի մասին ելույթներով, միևնույնն է՝ նրա գետնի տակ անցած մասը մնալու է որպես խավարասեր ու շարունակելու է իր սև ու մութ գործերը:

Արմինե Մկրտումյան