Ծառուկյանի ինչի՞ն է պետք Ազգային ժողովը

Ակնհայտ է, որ օրենսդիրները զբաղված են եղել կա′մ կոճակ սեղմելով, կա′մ միմյանց քննադատելով, իսկ կառավարությունը նրանց փոխարեն աշխատել է։

Խորհրդարանում 5 տարվա ընթացքում ընդունված օրենքների մոտ 10 տոկոսն է մայր օրենք, մնացած դեպքերում փոփոխություններ են արել ընդունված օրենքներում: Սա նշանակում է, որ անգամ օրենքները, ինչպես հարկն է, չեն կարողանում կամ ավելի ստույգ՝ չեն ցանկանում գրել։

Պառլամենտ մոնիթորինգն արձանագրել է նաև, որ ԲՀԿ-ն հակասական դիրքորոշումներ է ունեցել Ազգային ժողովում։ ՕԵԿ-ն ու ՀՅԴ-ն պասիվ են հանդես եկել, երբ կոալիցիա են կազմել ՀՀԿ-ի հետ։

Ընդհանուր առմամբ, խորհրդարանն, ըստ հետազոտության, առանձնապես արդյունավետ չի աշխատում՝ օրենքներ չի գրում, պատգամավորների հաճախելիությունը բարձր չէ․ հիշենք թեկուզ, որ մարտյան նիստերը չեն կայացել՝ քվորում չլինելու պատճառով, պատգամավորները չեն բարեհաճել Ազգային ժողով։

Ըստ զեկույցի՝ ամենաշատը բացակայել են «Բարգավաճ Հայաստան» կուսակցության պատգամավորները՝ Գագիկ Ծառուկյանի գլխավորությամբ։

Այստեղ հետաքրքիր է Գագիկ Ծառուկյանի դերը, ով այսօր առաջնորդում է ԲՀԿ քարոզարշավը՝ միլիոնանոց ներդրումների և բարեկեցիկ կյանքի խոստումներով, սակայն հինգերորդ գումարման Ազգային ժողովի աշխատանքներին գրեթե չի մասնակցել, չի հեղինակել որևէ օրենք և չի մասնակցել քննարկումներին։

Իսկ ընդհանրապես՝ այս կուսակցության ներկայացուցիչները հնարավորինս բացակայել են օրենսդիր կառույցի աշխատանքներից։

Եթե ԲՀԿ-ի՝ Ազգային ժողով անցնելուց հետո Ծառուկյանը շարունակի նույն ոգով, ապա նրա այսօրվա խոստումներն արդեն իսկ կասկածելի են. հանրության վստահված անձինք պետք է նստեն խորհրդարանում և գործ անեն:

Ինչպես ասում են՝ խոսքը գործ է, ոչ թե խոսքը խոսք է:

NEWSPRESS.am