Հայաստանը նոր Ազգային ժողով է ընտրում

Հայաստանում մեկնարկել են խորհրադարանական ընտրությունները: Այսօր՝ ապրիլի 2-ին, ժամը 08:00-ից բացվել են Հայաստանի բոլոր՝ 2009 ընտրական տեղամասերը: 

Այս ընտրություններին մասնակցում է 5 կուսակցություն և 4 դաշինք. «ԵԼՔ» դաշինքը, «Օհանյան-Րաֆֆի-Օսկանյան» դաշինքը, «Ծառուկյան» դաշինքը, «ՀԺԿ-Կոնգրես» դաշինքը, Հայաստանի Հանրապետական կուսակցությունը, Հայ Յեղափոխական Դաշնակցություն կուսակցությունը «Ազատ դեմոկրատներ» կուսակցությունը, «Հայկական վերածնունդ» կուսակցությունը և Հայաստանի կոմունիստական կուսակցությունը:

Կայացած սահմանադրական փոփոխություններից հետո այս ընտրություններն առաջին են ու վերջինը՝ գալիք 5 տավա համար: Այս ընտրություններով Հայաստանն անցնում է կառավարման խորհրդարանական մոդելի: Հաջորդ տարի՝ գործող նախագահ Սերժ Սարգսյանի պաշտոնավարման ժամկետը լրանալուց հետո, նոր նախագահին ընտրելու է խորհրդարանը, նախագահն էլ նշանակելու է խորհրդարանական կայուն մեծամասնության վարչապետին:

Ընտրություններն առաջին անգամ անցկացվում են բացառապես համամասնական ընտրակարգով (կուսակցական ցուցակներով)։ Առաջին անգամ կիրառվելու է նաև ռեյտինգային ընտրակարգը: Ընտրողն իրավունք ունի ընտրելու ինչպես միայն կուսակցությանը (կամ դաշինքին), այնպես էլ տվյալ տարածքում առաջադրված նույն կուսակցության կամ դաշինքի որևէ թեկնածուի:

Եթե ընտրողը ցանկանում է քվեարկել միայն կուսակցության կամ դաշինքի օգտին, ապա առաջարկվող 9 քվեաթերթիկներից պետք է ընտրի համապատասխան ուժի քվեաթերթիկը և առանց որևէ նշում անելու և առանց ծալելու դնի ծրարի մեջ: Կոնկրետ անձի ընտրելու դեպքում՝ ընտրողը պետք է վերցնի համապատասխան թեկնածուի կուսակցության քվեաթերթիկը և նշում կատարի տվյալ թեկնածուի անվան դիմաց:

Հավելենք, որ Ազգային ժողով անցնելու համար կուսակցություններին անհրաժեշտ է ստանալ ընտրողների ձայների առնվազն 5 տոկոսը, դաշինքներին՝ ավելի շատ՝ 7 տոկոսը։