Արկածախնդրությունը տեղ չունի մեր պետությունում. Վլ. Գասպարյանը՝ հնարավոր զինված ապստամբության մասին

Երևանի թիվ 9/21 ընտրատեղամասում իր ընտրությունը կատարեց ՀՀ ոստիկանապետ Վլադիմիր Գասպարյանը:

Պատասխանելով հարցին, թե նախընտրական շրջանում տեղի ունեցած միջադեպերից հետո ինչպիսի՞ ընտրություններ է ակնկալում, ոստիկանապետը նշել է. «Ես կարծում եմ, որ պահքի ժամանակահատվածում և պատասխանատու ժամանակահատվածում հայի վերջին խելքն աշխատելու է, և ամեն ինչ լինելու է նորմալ»:

Հարցին, թե նախորդ ընտրությունների փորձը հաշվի ոստիկանությունն ունի՞ նոր մարտավարություն:

«Նոր մարտավարություն չկա, կան որոշակի առանձնահատկություններ, որոնց վրա ոստիկանությունն ուշադրություն է դարձրել, բայց նոր բան ծառայության մեջ չկա»,- ասաց Գասպարյանը:

Խոսելով ընտրակաշառքների վերաբերյալ լուրերի մասին՝ նա նշեց, որ ինքն առիթ ունեցել է ընտակաշառքների մասին խոսելու. «Դա այնպիսի հանցատեսակ է, որ պետք է լինի դիմող կողմը, վերցնող կողմը, հայտարարություն տվող կողմը»:

Ինչ վերաբերում է թաղային հեղինակություններին, որոնք ներգրավված են ընտրություններում, և հանձնաժողովի անդամները երբեմն չեն կարողանում նրանց դեմ, հարց հնչեց՝ ոստիկանները կարողանո՞ւմ են. «Դե հիմա կտեսնեք՝ կարողանո՞ւմ են թաղային հեղինակությունները, թե՞ չեն կարողանում»:

Հարցին էլ, թե ինչպես է ինքը վերաբերվում ՕՐՕ դաշինքի՝ հետընտրական զարգացումներին վերաբերող հայտարարություններին, հնարավոր փողոց դուրս գալու, զինված ապստամբության մասին, Վլադիմիր Գասպարյանը նշեց. «Չեմ կարծում, որ արկածախնդրությունը տեղ ունի մեր պետությունում: Նորից եմ ասում՝ պահքի, խաղաղության ժամանակահատված է, և ցանկացած այլ դրսևորումներ, արկածախնդրություններ պատժվում են ոչ միայն օրենքով, այլ նաև…»,- նա խոսքը կիսատ թողեց և բազմանշանակ ժպտաց:

Եզրափակելով՝ ոստիկանապետը նշեց, որ ոստիկանությունը միշտ պատրաստ է ամեն ինչի և ակնկալում են խաղաղ ելք: