Եթե Ծառուկյան դաշինքը 50+1 տոկոս ձայներ չհավաքի, Գագիկ Ծառուկյանի ընկերները 15 մլրդի ներդրում չեն անի

Թիվ 29/29 ընտրատեղամասում իր ընտրությունը կատարեց «Ծառուկյան» դաշիքնի առաջնորդ Գագիկ Ծառուկյանը:

Լրագրողների հետ զրույցում նա նշեց, որ քարոզարշավի ընթացքում իրենք արդեն տեղեկացրել են հանրության խնդիրների ու լուծումների մասին, այսօր արդեն ամեն ինչ կախված է ժողովրդից, թե ժողովուրդն ապրիլի 3-ին ինչ Հայաստան է ուզում: «Ում կվստահեն, ձայն կտան, թող նրանք էլ պատասխան տան»:

Հարցին, թե Ծառուկյանի ընկերները խոստացված 15 միլիարդի ներդրումը կանե՞ն Հայաստանում, եթե «Ծառուկյան» դաշինքն անցնի խորհրդարան, բայց չհավաքի 50+1 տոկոս ձայներ, դաշինքի առաջնորդը պատասխանեց.

«Ես ասեցի՝ իմ ընկերները պատրաստ են աջակցելու, երևի դուք տեսաք, որ մարդիկ այդպիսի հայտարարություն արեցին: Դա դեռ մի ընկեր, ես բազմաթիվ ընկերներ ունեմ տարբեր երկրներում, ովքեր հավատում են Ծառուկյանին, Ծառուկյանի ապրածին, գիտեն, որ Ծառուկյանը երբեք խաբող մարդ չի, նա արժանապատիվ մարդ է: Եթե իրավունքները իմ ձեռքում չլինեն, երաշխավոր չլինի, ո՞նց եք պատկերացնում, մտածում: Չեն ներդնի, իհարկե»:

Ճշտող հարցին, թե այսինքն՝ եթե իրենք իշխանություն չլինեն, ներդնողները չե՞ն վստահի այս իշխանություններին և ներդրումներ չե՞ն անի:

«Դուք եղեք Ծառուկյանի տեղը: Մարդը պատասխանատվություն վերցնում է այն ժամանակ, երբ կարող է դրա պատասխանը տալ: Ես ոչ մեկին չեմ ուզում փնովել՝ ո′չ կառավարությանը, ո′չ իշխանությանը, ո′չ որևիցե այլ կուսակցության»,- ասաց «Ծառուկյան» դաշինքի առաջնորդը: