«Աղջի′կ ջան, զաչեմ տի նաս ֆոտկըյեշ». Եհովայի վկաները շարունակում եմ զոմբիացնել մարդկանց (լուսանկարներ)

Մտովի գործերիս հետ՝ վազքով անցնում եմ Երևանիս մայթերից մեկով, ու մտածում օրվա անելիքներս ժամանակին հասցնելու մասին: Հանկարծ նստարանին նստած երկու կին հետևիցս ձայն տվեցին. «Բարև ձեզ»: Մի պահ վատ զգացի ու անմիջապես հետ դարձա. մտածում եմ՝ այս ինչքան եմ մտքերով, որ ծանոթ մարդկանց չեմ նկատել: Բայց մոտենալով՝ տեսա 70-ն անց երկու անծանոթ կնոջ, ովքեր հանգիստ ժպիտով նայեցին ու ինձ պարզեցին մի բրոշյուր՝ փորձելով բացատրել «երջանկության գաղտնիքը»:

Ի պատասխան՝ ես պարզապես սկսեցի նկարել նրանց: Կանանցից մեկը կիսառուսերենով հարցրեց. «Աղջի′կ ջան, զաչեմ տի նաս ֆոտկըյեշ»:

Չհասցրի պատասխանել՝ մյուս կինը միջամտեց. «Զաչեմ, զաչեմ, նե զնայեշ զաչեմ… էսա մի տեղով մեզ ցույց կտան…»:

Հարցնում եմ. «Եթե գիտեք, որ այնպիսի բան եք անում, որ պետք է մի տեղով ցույց տան՝ ինչո՞ւ եք անում»:

«Ո՞նց ինչու, սա է իսկական հավատքը,- անկեղծ զարմացած ասաց կանացից մեկն ու շարունակեց,- մենք Եհովայի վկաներն ենք, քարոզում ենք Աստվածաշնչի հավատքը՝ այն ամենը, ինչ գրված է Աստվածաշնչում՝ իսկական քրիստոնեություն…»:

Ու քանի որ անիմաստ էր հարցնել, թե ո՞վ է հանձնարարել իրենց քարոզել, պարզապես հարցնում եմ՝ «Եթե Աստվածաշունչն եք քարոզում՝ ինչո՞ւ մեր քրիստոնեական եկեղեցին չեք գնում»:

Ի պատասխան հարցիս՝ այդ երկու կանայք, ջղաձգվեցին՝ «Իյա, ո՞վ ասեց, որ եկեղեցին ճիշտ ա քարոզում…»:

Ավելորդ համարելով ներկայացնել մեր խոսակցության շարունակությունն ու հրաժեշտը, պարզապես ուզում եմ ասել, որ մեր օրերում ուղղակի անիմաստ է սթափ մտքով բանավեճի մեջ մտնել այդ զոմբիացված ուղեղով ու «ամերիկյան» ապուշ ժպիտով մարդկանց հետ, ովքեր անգիր արած նախադասություններով փորձում են քեզ համոզել ուրանալ հավատքդ: Որքան էլ փորձես չզայրանալ, չնյարդայնանալ, չես կարողանում անտարբեր մնալ հասարակության այն ստվար հատվածի նկատմամբ, ովքեր իրականում հակաքրիստոնեկան քարոզչություն են իրականացնում:

Եհովայի վկաներն իրավունք չունեն հանրային քարոզչություն անցկացնելու, գրականություն բաժանելու և հանրային վայրերում հոգեորսությամբ զբաղվելու, թեկուզև հենց այն պարզ պատճառով, որ այստեղ օրենքի խախտման տարրեր կան:

Այս խնդիրը երկրի իշխանության ու կառավարության մակարդակով պետք է լուծվի, սակայն ոչ ոք չի զբաղվում դրանով՝ մի քանի պատճառով:

Իշխանությունը, հավանաբար, վախենում է Եվրախորհրդից:

Բացի այդ, իշխանությանը զոմբիացված ժողովուրդը ձեռք է տալիս:

Եվ, ի վերջո, NEWSPRESS.am-ի որոշ աղբյուրների համաձայն, «վերևներում» նույնպես կան մարդիկ, ովքեր այս կազմակերպության անդամ են, և տրամաբանական է, որ այս ընդհանուր ֆոնին՝ հոգեորսները շարունակելու են ո՛չ միայն մնալ անպատիժ, այլև անարգել գրավել հասարակության ուշադրությունն ու զոմբիացնել նրանց:

Արմինե Մկրտումյան