Դաշնակցություն-Ծառուկյան դաշինք. նստել են ՀՀԿ-ի հովին` գիտեն պոչի հովն է

Դաշնակցությունը և «Ծառուկյան» դաշինքը չեն մասնակցի Երևանի քաղաքապետի ընտրություններին: Դաշնակցությունը դժգոհ է Երևանում հավաքած ձայներից, «Ծառուկյան» դաշինքը Երևանի զարգացման ծրագիր չունի:

Այս երկու կուսակցություններն անցել են Ազգային ժողով. մեկը՝ որպես կա′մ ընդդիմություն, կա′մ իշխանություն, մյուսը` նույնպես. դեռևս չեն կողմնորոշվել:

Կարծես թե դերաբաշխումն ուշանում է:

Դեռ բավական չէր, որ ՀՀԿ-ն դաշնակներին Ազգային ժողով բերելու և կոալիցիա կազմելու համար ամեն ինչ արեց, իսկ Ծառուկյանին «քարշ տվեց» քաղաքականություն, այժմ էլ հրահանգել է քիթը չմտցնել Երևանի քաղաքապետի ընտրություններում:

Որոշված է՝ Տարոն Մարգարյանն է լինելու քաղաքապետ:

Իսկ ինչո՞ւ «Ելքը», չի բացառվում, որ «Ելքին» պահել են ընտրությունների բալանսը և համուհոտը պահպանելու համար, չէ՞ որ դեռևս ոչ ոք ավելի բարձր, քան «Ելքը» չի կարողանում բղավել:

Այս կուսակցությունն ընտրությունների անհրաժեշտ բաղադրիչ է:

Դաշնակցությունը դեռևս գոյատևում է կուսակցության անցյալի հիշողությունների ստվերում, այնտեղ ապահով է, իսկ Դաշնակցության նորագույն պատմությունը բիզնեսի, մասնավորի, սեփական գրպանի և մեջքածռության պատմություն է:

Երևի Դաշնակցությունը նման խոնարհած իրանով երբեք չի եղել իր պատմության էջերում, սխալվել է, սակայն չի ծնկել. Իսկ այս ընտրություններում մասնավորապես Դաշնակցությանը, եթե ՀՀԿ-ն չօգներ, ապա կուսակցությունը ոչ թե ԱԺ, այլ ոչ մի տեղ էլ չէր գնա. այն, կարծես թե, կորցրել է նաև այն կայուն ընտրազանգվածը, որ ուներ:

Իսկ «Ծառուկյան» դաշինքի պահով՝ Ծառուկյանը ոչ թե ծնկել է, այլ միշտ էլ ծնկած է լսել ի վերուստ հնչած հրահանգները:

 Գուցե հանրությանն համար նա Ծառուկյանն է,

սակայն ոչ երկրի նախագահի համար:

Իսկ այժմ Երևանի քաղաքապետի ընտրություններում այս երկու կուսակցությունները չեն մասնակցելու, քանի որ նման հրահանգ կա`չմասնակցել. Ի դեպ, երկուսն էլ ժամանակ առ ժամանակ, ժամանակը գիտի, ընդդիմություն են խաղում, նայած՝ քամին որ կողմից է փչում:

Երևանի քաղաքապետի ընտրությունը երրորդ կարևոր ընտրությունն է ՀՀ նախագահի և ԱԺ ընտրություններից հետո, որին չմասնակցելը շատ հարցերի պատասխաններ է տալիս: Իսկ այս երկու կուսակցությունները, ծիծաղելի պատրվակներ բերելու փոխարեն, կարող էին ազնիվ լինել և հանրությանն ասել` մեզ հրահանգված է չմասնակցել քաղաքապետի ընտրություններին, թե չէ` ծրագիր չունենք, ձայներն են քիչ. իսկական Համզաչիման:

NEWSPRESS.am