Առանց «Ելքի» և «Ծառուկյան» դաշինքի խորհրդարանը կվերածվեր աշխարհի ամենատխուր երգչախմբի

NEWSPRESS.am-ի զրուցակիցն է քաղաքագետ Գագիկ Համբարյանը:

– Պարո՛ն Համբարյան, Հայաստանն ասես վեր է ածվել «կրկեսի». պարտված ՀՀԿ-ականներն ընտրակաշառքներն են փորձում հետ հավաքել կամ գյուղացիներից խլում են այն, ինչ տվել էին այդ համայնքներին: Ինչպե՞ս կմեկնաբանեիք այս ամենը:

-Տեղի է ունեցել առուծախ՝ ընտրողի և թեկնածուի միջև: Ու քանի որ ընտրողը խաբել է թեկնածուին, ինքնըստինքյան թեկնածուն անում է այն, ինչ պետք է աներ: Այսինքն՝ ընտրողին խոստացված լուսավորությունը, «ՈւԱԶ»-ներն ու գումարները նրանք հետ են վերցնում: Տեղի է ունենում կոնֆլիկտ: Ընտրողները մտածում էին, որ երբ իրենք գումարներ են վերցնում թեկնածուից և խաբում, դա անհետևանք պետք է մնա, սակայն դա չէր կարող անհետևանք մնալ: Այսպիսի խայտառակ փաստերից ձերբազատվելու համար ինձ թվում է՝ այս ամենին պետք է խառնվի Հանրապետական կուսակցությունն ու նրա վերնախավը: Նրանք պետք է իրենց ձախողված թեկնածուներին հասկացնեն, որ չի կարելի նման բան անել, որովհետև սա բումերանգի նման հարվածում է ՀՀԿ-ի ռեյտինգին:

-Կարծիք կա, որ խորհրդարանը կլինի անդեմ՝ հաշվի առնելով, որ այնտեղ ընդգրկվել են «անհայտ գործիչներ»:

-Մի օր գալու էր այն պահը, երբ պետք է տեղի ունենար սերնդափոխություն, նոր քաղաքական գործիչներ պետք է ի հայտ գային, իսկ հներն անցնեին պատմության գիրկը: Դա ես անդեմություն չեմ համարում: Այլ հարց է, որ որոշ պատգամավորներ, ովքեր նաև նախկին խորհրդարանականներ էին, շարունակեն նույն իրենց գործելաոճը: Այսինքն՝ համարեն, որ եթե իրենք ընտրվել են, ուրեմն կարող են 5 տարի այլևս ոչինչ չանել՝ հարց ու պատասխանի չմասնակցել, հայտարարությամբ ելույթ չունենալ, մի անգամ չպաշտպանել իրենց ընտրատարածքների ընտրողների շահերը: Այսինքն՝ շարունակվի նույն տեմպերով. մենք դրա վառ օրինակն ունենք:

Մենք տխուր փաստ արձանագրեցինք, որ մեր 130 պատգամավորից 40-50-ը 5 տարվա մեջ մի «ա» տառ չի ասել, էլ ինչի՞ մասին է խոսքը: Հենց այս պահին էլ ես կարող եմ անմիջապես ասել մոտ 10 հոգու անուն, ովքեր կրկին վերընտրվել են Ազգային ժողովում: խորհրդարանը կարող է անդեմ ու անձայն լինել, հենց նրանց պատճառով, եթե նրանք շարունակեն իրենց գործունեությունը:

Գոնե ուրախ եմ, որ կա «ԵԼՔ» դաշինքը, «Ծառուկյան» դաշինքը, որտեղ կան մի քանի ինտելեկտուալ պատգամավորներ, ովքեր կարող են տոն սարքել ԱԺ-ում: Հակառակ դեպքում՝ խորհրդարանը կվերածվեր աշխարհի ամենատխուր երգչախմբի:

-Ըստ Ձեզ, կարո՞ղ են «ԵԼՔ»-ի կամ «Ծառուկյան» դաշինքի մի քանի պատգամավորները որևէ հարց լուծել խորհրդարանում, հատկապես քվեարկությունների հետ կապված:

-Քվեարկությունների ժամանակ նրանց ձայնն, իհարկե, չի կարելի ավելացնել, որ հավասարվի իշխանական թևի ձայներին, բայց գոնե խորհրդարան ներկայացված օրինագծերի քննարկումների ժամանակ նրանք կարող են ինչ-որ ազդեցություն ունենալ: Այլ բան է բացարձակ անձայն ընտրություն ունենալը և այլ բան է, եթե կան մարդիկ, ովքեր, ճիշտ է, հասկանում են, որ իրենք շատ քիչ ազդեցություն կարող են ունենալ, սակայն կարող են իրենց ձայնով ու ելույթներով ինչ-որ բան փոխել:

-Այնուամենայնիվ, կարո՞ղ ենք ասել, որ այս ընտրությունները Հայաստանում ինչ-որ բան փոխեցին:

-Գրեթե ոչ մի բան: Հայաստանում, ինչպես կար, այնպես էլ վերարտադրվեց Հանրապետական կուսակցությունը: Իհարկե, ինքը մի քիչ համեստ գտնվեց և ի սկզբանե չհայտարարեց, որ վայելում է ընտրողների 50+1 տոկոսը: Գտնում եմ, որ գրեթե ոչինչ չի փոխվել: Փոխվեց միայն մեկ բան. հասարակության կողմից իշխանությունների հետ կապակցված «Հայկական վերածնունդ» կուսակցությունը դուրս մնաց խորհրդարանից: Թե չէ այս կուսակցություններից ներկայացուցիչներ էլի կան, իսկ «Ժառանգությունը» վաղուց էր քայքայվել…

«ԵԼՔ»-ին և «Ծառուկյան» դաշինքին տրամադրված է ընդդիմադիր թևը, իսկ ՀՅԴ-ն կլինի կցորդ իշխանությունը, քանի որ համագործակցությունն այս երկու կուսակցությունների միջև համարում եմ անտրամաբանական և անիմաստ: Քանի որ կոալիցիա կարելի է ձևավորել, երբ քաղաքական որևէ ուժ չի կարողանում իր հնարավորություններով ձևավորել կառավարություն: Սակայն եթե մենք ունենք քաղաքական ուժ, ի դեմ ՀՀԿ-ի, որը սեփական ուժերով կարող է միանձնյա կառավարություն ձևավորել, և լինելով աջակողմյան հայացքներով՝ համագործակցել ձախակողմյան սոցիալիստական ՀՅԴ-ի հետ, սա աբսուրդ է, եթե ձեռք է տալիս՝ կարող են շարունակել, բայց ՀՅԴ-ն կմնա որպես իշխանության կցորդ:

Զրուցեց Արմինե Մկրտումյանը