Կառավարությունը պետք է փակի սնանկության կառավարչի ախորժակը. նաիրիտցիներ (լուսանկարներ, տեսանյութ)

Նաիրիտցիներն ահազանգում են՝ գործարանի վերագործարկելու հավանականությունը նվազում է:

«Նաիրիտ» գործարանի նախկին աշխատակիցների բազմաթիվ դժգոհությունների և որոշակի միջնորդության արդյունքում սառեցվել էր «Նաիրիտի» սնանկության և օտարման հարցը:

Սակայն, ինչպես NEWSPRESS.am-ին հայտնեցին «Նաիրիտի» համակարգող խմբի անդամները, իրենք տվյալներ ունեն, որ վերջերս օտարման աշխատանքները կրկին սկսվել և բավականին մեծ թափ են առել:

Խմբի անդամների փոխանցմամբ՝ սնանկության կառավարիչ Կարեն Ասատրյանը, հայտարարել է, թե իրեն որևէ մեկը չի կարող ցուցում տալ և ինքն իր գործը շարունակելու է:

Նաիրիտցիները լուրջ կասկածներ ունեն, որ կառավարիչը շահագրգռված է «Նաիրիտն» արագ լուծարելու հարցում, քանի որ բավականին մեծ եկամուտ է ստանում գործարանի լուծարումից։

Այսինքն՝ օրենքի համաձայն, սնանկության կառավարչի եկամուտը կախված է պարտատիրոջ պահանջների բավարարման չափից, (որքան շատ բավարարի պարտատիրոջ պահանջները, այնքան ավելի մեծ տոկոսներ կստանա գործարքից):

«Նաիրիտի» համակարգող խմբի անդամների խոսքով՝ ըստ օրենքի, կառավարիչն ամենաքիչը 1 մլն․ դոլար փող է ստանալու։

Այնպես որ՝ նաիրիտցիները վստահ են՝ սնանկացման գործընթացը վերսկսվել է միայն Կարեն Ասատրյանի շահագրգռվածության պատճառով:

NEWSPRESS.am-ի հետ զրույցում նաիրտցիներն այս առումով հատկապես առանձնացնում են գործարանի 1-6 Օդաբաժանման արտադրամասի կարևորությունը, որտեղ ստանում են թթվածին: Նրանց խոսքով՝ արտադրամասի օտարման դեպքում, թողարկումն այլևս անհնար կլինի:

Խումբը դիմում է կառավարությանը՝ սնանկության կառավարչի ախորժակը փակելու համար միջոցներ ձեռնարկելու խնդրանքով:

Հիշեցնենք նաև, որ նախորդ շաբաթ նաիրիտցիները ստորագրահավաք են կազմակերպել՝ գործարանի մասին իրենց հավաքած փաստերով դատախազին ներկայանալու համար:

Մանրամասները՝ տեսանյութում