Շատ ուրախ եմ. Սթինգը գոհ է երկրպագուների՝ Մխիթարյանին նվիրված երգից

Բրիտանացի հայտնի երգիչ Սթինգը BBC-ին տված ծավալուն հարցազրույցում խոսել է նաև «Մանչեսթեր Յունայթեդի» երկրպագուների կողմից հնչող իր՝ Englishman in New York երգին, որը երկրպագուները նվիրում են Հայաստանի ազգային հավաքականի ավագ Հենրիխ Մխիթարյանին: Յունայթեդի ֆաները երգում են, իհարկե, փոփոխված տարբերակով՝ “Whoa Mkhitaryan, Henrikh Mkhitaryan, he’s our midfield Armenian” (Հոա, Մխիթարյան, Հենրիխ Մխիթարյան, նա մեր հայ կիսապաշտպանն է):

Հայտնի երգիչը նշել է, որ ինքը տպավորված է եղել այն բանից, որ երկրպագուներն օգտագործել են իր երգը՝ նվիրելով այն Հենրիխ Մխիթարյանին:

«Ես շատ ուրախ եմ այդ առթիվ: Ինձ դուր է գալիս՝ ինչպես են երգերը վերադառնում ու վերականգնվում՝ տարբեր նպատակների համար: Դա ևս շատ լավ է: Որպես երգահան՝ ես կարծում եմ՝ դա մի արտառոց բան է՝ ինչպես են այդ երգերը հասնում մարդկանց լայն զանգվածների, և հանկարծ նրանք նույն բանն են երգում»,- ասել է երգիչը: