Հայաստանում ֆեոդալիզմ է, ընկել ՍԱՍ-ի Արտակ են խաղացնում

Հայաստանյան ընտրություններով ոչ ոքի չես զարմացնի` և′ մարտարվեստ, և′ կաշառք, և′ նվիրյալ տիկնայք, և′ երգ ու պար: Այսօր հայ հանրությունն արթնացավ մեկ այլ Հայաստանում. պարզվեց, որ ՍԱՍ-ի Արտակի եղբայրը նախընտրական ժողով է արել «ՍԱՍ գրուպի» աշխատողներով և նախընտրական քննարկում անցկացրել:

Այսօր այս հարցն ակտիվորեն քննարկվում էր՝ ստրուկներ և այլն, սակայն փորձենք պարզել՝ այդ ինչո՞ւ ոչ ոք չհամարձակվեց հակադարձել Արտակի եղբորը, և ժողովի ժամանակ բոլորը հլու-հնազանդ լսեցին նրանց հանդիմանանքները:

Նույն կերպ մենք դիտողություն չենք անում երթուղայինի վարորդին, ով ծխում է, դիտողություն չենք անում փողոցում աղբ թափողին, ընդհանրապես ապրում ենք գլուխներս կախ: Եթե քննարկում են, թե դուրս եկեք աշխատանքից, այլ աշխատանք կգտնեք. քննադատելն այնքան հեշտ է:

Հայաստանում անգամ վաճառողուհի աշխատելու համար պետք է ծանոթ ունենաս:

Իսկ ԱԺ-ո՞ւմ: Չէ՞ որ նույնը կատարվում է ԱԺ-ում. բոլորը միահամուռ կողմ են քվեարկում ՀՀԿ-ի բերած նախագծերին, իսկ հիմա ընկել ՍԱՍ-ի Արտակ են խաղացնում:

Չէ՞ որ այդ նույնը կատարվում է հենց մեր աչքի առջև` պատգամավորների մակարդակով:

Նույնը կարելի է դիտարկել նաև հանրության կտրվածքով. նման «սասիարտակները» լիքն են մեր շուրջը, դա նաև մենթալիտետի խնդիր է:

Դեռևս չենք ձերբազատվել «ֆեոդալի» և «ֆեոդալի հպատակների» սինդրոմից:

Եթե Էդուարդ Շարմազանովը կարող է հայտարարել, որ Սերժ Սարգսյանը ՀՀԿ-ի հայրն է, պետք չէ զարմանալ ՍԱՍ-ի Արտակի պահվածքի վրա, նա գոնե իրեն ողջ աշխատակազմի հայր չի կոչել:

Ի դեպ, եթե ՍԱՍ-ի Արտակի կամ նրա եղբոր պահվածքը որևէ բացասական նշանակություն ունենար մեր երկրի համար, ապա հենց նույն Շարմազանովը չէր հայտարարի. «Դրա համար կա ԿԸՀ, կան համապատասխան իրավապահ մարմիններ: Իրենք պետք է որոշեն`օրենքի խախտո՞ւմ է, թե՞ օրենքի խախտում չէ: Ես իրավաբան չեմ, չեմ կարող ասել: Բայց ոչ միայն այս դեպքում, առհասարակ, եթե օրենքի հետ որևէ խնդիր չկա`բնական գործընթաց է»:

Իր հերթին ՀՀԿ-ական Վահրամ Բաղդասարյանն ասել է, թե արդյոք Արտակ Սարգսյանը տեղյա՞կ է եղել նախընտրական ժողովից:

Կարճ ասած` նորմալ է ամեն ինչ:

Թե չէ հանրությունը քննարկում է ՍԱՍ-ի Արտակ, հա՜յ ՍԱՍ-ի Արտակ: Դեռ հայտնի չէ, թե ՍԱՍ-ի Արտակի ձայնագրությունները հրապարակելով՝ ով ում ջրաղացին է ջուր լցնում կամ ինչ հարց է ցանկանում լուծել:

Նաև պետք է հիշել, որ ընկածին չեն խփում, չէ՞ որ բոլորը նրան ՍԱՍ-ի Արտակ են կոչում:

Ի դեպ, նա ևս դեմ չէ:

NEWSPRESS.am