Ինչու է «աղմկում» լոլիկը

Վերջերս հայտնի դարձավ, որ թուրքական լոլիկ է ներկրվում հայկական շուկա, և թուրք ֆերմերներից մեկն էլ ասել էր, որ լավ լոլիկներն իրենք են ուտում, վատ լոլիկները վաճառում են հայերին և քրդերին:

Նախ նշենք, որ թուրքերի խորամանկությունը նրանցից առաջ է ծնվել, և երևի թե նրանք նման կերպ վարվելով` չէին բարձրաձայնի խնդրի մասին: Այս ամենից «սարքածի» հոտ է գալիս:

Իսկ այն, որ թուրքական լոլիկ կա հայկական շուկայում` նորություն չէ, թուրքական լոլիկներ միշտ էլ եղել են, անգամ արգելված ժամանակահատվածում, երբ Թուրքիայից արգելված էր սննդամթերք ներկրելը: Մթերքը բերվում էր Վրաստան, որտեղ էլ մակնշվում էր ցանկացած այլ երկրից, բացի Թուրքիայից և ներկրվում Հայաստան, կամ էլ մաքսակետով անցնում էր այլ մթերքի անվան տակ: Այս պրակտիկայի մասին միշտ էլ խոսվել է լրատվամիջոցներով, և այն նորություն չէ:

Սակայն ինչո՞ւ այժմ լոլիկի շուկան տակնուվրա եղավ:

Նախ նշենք, որ տեղական լոլիկ ասվածն այժմ քիչ է հայկական շուկայում: Սաստիկ ձմռան ցրտերը ջերմոցատերերին թույլ չտվեցին լոլիկ մշակել, այս օրերին են ջերմոցատերերը ջերմոցներում լոլիկի թաղարներ տնկում, իսկ ընդհանրապես ջերմոցները ձմռանը չեն ծառայում, երևի թե միայն կանաչեղեն, քանի որ վառելիքը թանկ է, և մարդիկ չեն կարողանում ծախսերի տակից դուրս գալ:

Լավ ինչո՞ւ է աղմուկը:

Կարող ենք համոզված ասել, որ Հայաստանում գործող մեծ ջերմոցները, որոնց սեփականատերերը խոշոր հողատերեր և օլիգարխներ են, լոլիկ են մշակել և ցանկանում են այն իրացնել նաև շուկայում, սակայն կան ճարպիկ ներկրող-օլիգարխներ, որոնք լոլիկ են բերում Թուրքիայից այլ մթերքի կամ ապրանքի անվան տակ և «մխտռում» շուկան:

Այժմ պարզապես գնում է բիզնեսմենների պատերազմ ԶԼՄ-ներով` ուրիշ ոչինչ:

Ինչ վերաբերում է այն բանին, թե թուրքական վատորակ լոլիկ են վաճառում հայերին, նշենք, որ հայ ջերմոցատերերը, ովքեր կարողանում են ձմռանը լոլիկ մշակել, լոլիկները հատուկ նյութով կարմրացնում են, քանի որ ձմռան անուժ արևը լոլիկին չի հասցնում լիարժեք կարմրության: Բացի այդ, այնքան են պարարտանցում բույսը տարբեր ոչ բնական պարարտանյութերով, որ ստուգելու պարագայում սպառողը պարզապես կզարմանա: Չմոռանանք հիդրոպոնիկայով աճեցվող բանջարեղենի մասին:

Իսկ այն, որ թուրքական լոլիկ չի ներկրվում, փաստաթղթերով այդպես է, նաև գյուղմթերքը սահմանին չի ստուգվում, ստուգվում է, երբ պատահական ներկրող է լոլիկ բերում, իսկ տեղական գյուղմթերքը, նաև լոլիկի որպիսությունը երբեք հայտնի չէ սպառողին. գործը դրան երբեք չի հասնում:

Այնպես որ՝ ներկայումս օլիգարխները հայաստանյան շուկայում տեղ են անում իրենց լոլիկի համարը` մի կողմից ներկրողները, մյուս կողմից՝ արտադրողները. հանրությունը կուլ է գնում նրանց լեզվակռիվներին:

NEWSPRESS.am