Ծիրանի դիմաց՝ տնօրեն․ Փարաքարի դպրոցի տնօրենը վերընտրվեց (ֆոտո, վիդեո)

Տնավարի, յուրայինների միջավայրում ու «մերոնքականներով» վիճակներում Փարաքարում անցավ տնօրենի մրցույթ: Արմավիրի մարզի «Փարաքարի միջնակարգ դպրոց» ՊՈԱԿ -ի գործադիր մարմնի` տնօրենի պաշտոնն զբաղեցնելու համար Կրթության և գիտության նախարարությունը հայտարարել էր մրցույթ: Տնօրենի թեկնածուները երկուսն էին՝ արդեն 14 տարի գործող տնօրեն Վարազդատ Հակոբյանն ու Վաղարշապատի թիվ 12 միջն․ դպրոցի դասվար Ռուզաննա Ժամհարյանը:

8 հոգուց բաղկացած խորհուրդը միաձայն ու համերաշխ ընտրեց գործող տնօրենին։

Անկեղծ լինելու համար նախ պետք է նշել, որ գործող տնօրենն արդեն հատել է թոշակի անցնելու տարիքը, ու չնայած նրան, որ կենսաթոշակ է ստանում, նաև համառորեն կառչել է տնօրենի իր աթոռին` չցանկանալով իր տեղը զիջել երիտասարդ կադրերին։ Նախ, պետք է նշել, որ օրենքով չի թույլատրվում, ավելին՝ պատժելի է, երբ թոշակի անցած քաղաքացին միաժամանակ և՛ թոշակ է ստանում, և՛ աշխատում է։

Մյուս կողմից էլ վարչապետ Կարեն Կարապետյանը հայտարարել էր, որ ժամանակն է դուրս գալ կաղապարներից և տարեց կադրերին փոխարինել նորերով։ Մասնավորապես՝ Կրթության և գիտության նախարարին հանձնարարել էր ուշադրությունը սևեռել հանրակրթական դպրոցների բարձիթողի վիճակին, որտեղ գործում է խնամի-բարեկամ տարբերակը։ Սակայն երևի թե այս հանձնարարականը Կրթության նախարարի ականջի կողքով է անցել, և նա չի նկատում, որ դպրոցներում նույն «բարդակ» վիճակն է։

Ինչ վերաբերում է Փարաքարի դպրոցի տնօրենի մրցույթի դեպքին, ապա այստեղ տնօրենն ինքն իր խոսքում բաց թողեց, թե «մարզպետն ա որոշողը»։ Իսկ թե որտեղից մարզպետ Աշոտ Ղարհամանյանին նման լծակներ և, ով է նրա թևերի տակ ձմերուկներ դրել, սա արդեն առանձին թեմա է։

Մրցույթի ընթացքում նույնիսկ ԿԳ նախարարության ներկայացուցիչն ընդամենը հրահանգավորված զինվորի դեր էր խաղում՝ «պեշկա», ինչպես ասվել էր, այնպես անում էր (երևի այդ կերպ փորձում էր աթոռը պահել): Հանգիստ ու սուսուփուս նստած՝ նա հետևեց մրցույթի ողջ ընթացքին, ու չնայած հանձնաժողովի ակնհայտ տրամադրվածությանն ու մրցույթի կանխատեսելի ավարտին՝ նա մեզ հետ զրույցում հայտարարեց, թե ամեն ինչ անցավ օրենքի սահմանում:

Իհարկե, սա խոսում է այն մասին, որ ԿԳ ներկայացուցիչը կա′մ անգրագետ է, կա′մ լավ հրահանգավորված է վերադասի կողմից: Նրա դրական մոտեցումը կարելի է պարզապես համարել թերացում՝ «պռոմըխ» իր աշխատանքում:

Անզեն աչքով կարելի էր տեսնել, թե ինչ տրամադրվածությամբ ու ագրեսիվ մոտեցմամբ էին հանձնաժողովի անդամները հարցեր տալիս երիտասարդ կադրին՝ Ռուզաննա Ժամհարյանին: Նրանք այնքան անփույթ ու անպատասխանատու էին այդ հարցում, որ նույնիսկ չէին նկատում, որ տալիս են միևնույն հարցերը, որոնց պատասխանն ուսուցչուհին մի քանի անգամ հնչեցրեց, և ստիպված ամեն պատասխանից առաջ կրկնում էր. «ես նոր ասացի…», «արդեն ասացի…», «ասացի, բայց նորից ասեմ…» ու համբերատար կրկին պատասխանում էր հարցին: Իսկ հանձնաժողովի անդամներից մեկը նույնիսկ իրեն թույլ տվեց Ռուզաննա Ժամհարյանին դիմել՝ ոչ թե ազգանունով և հարգալից, այլ հեգնանքով և «աղջիկ ջանով»: Թեև իր կեցվածքով ու կիրթ վարվելաձևով Ժամհարյանը նման առիթ չտվեց։

Պատկերն այլ էր գործող տնօրեն Վարազդատ Հակոբյանի դեպքում: Նախ նա մտավ ու ոչ թե նստեց, այլ «փռվեց» աթոռին, ապա նայելով տեսախցիկին՝ մի փոքր հավաքեց իրեն։ Իսկ վերոհիշյալ տիկինը նրան հարցերն ուղղում էր «Հակոբյան ջան»-ով: Ընդ որում, նրա հարցերը գործի հետ կապ չունեին։ Օրինակ՝ նա հարցնում էր, թե արդյո՞ք դպրոցը մասնակցել է առարկայական որևէ օլիմպիադայի, այն դեպքում, երբ նպատակը ոչ թե կատարած աշխատանքները ներկայացնելն էր, այլ առաջիկա ծրագրերը ներկայացնելը։

Տնօրենը նաև տեղեկացված լինելով ԿԳՆ-ի առաջիկա ծրագրերին՝ կապված իր դպրոցի հետ, իր առաջիկա ծրագրերում ընդգրկել էր հենց այդ կետերը։ 14 տարվա տնօրենը, ով հենց նոր սկսեց մտածել քանդված դպրոցի մասին, խոստանում է նոր դպրոց կառուցել՝ իր ընտրվելու դեպքում։

Նա նաև խորհրդի անդամներին խոստացավ ավելացնել լիազորությունները․․․Հակոբյանը նաև խոստացավ իր դպրոցի հարակից այգուց նրանց ծիրան հյուրասիրել։ Վերջիններս սիրով նշեցին, որ դեռ կգան իրար հետ ծիրան ուտելու, իսկ տնօրենին վերընտրելուց հետո ջերմորեն ողջագուրվեցին նրա հետ։

Հ․Գ․ ընտրվելուց հետո, երբ լրագրողներն ակնարկեցին ընտրության անարդար արդյունքների և ընթացքի մասին, խորհրդի ողջ անձնակազմը, ինչպես միաձայն ընտրել էր իր տնօրենին (հավանաբար նրանից խոստումներ ստանալով և որոշ ակնկալիքներով), այնպես էլ միահամուռ ու միաձայն բառացիորեն  հարձակվեցին մեզ վրա և սկսեցին պաշտպանել իրենց «շեֆին»։

Իսկ ողջ կռվի ընթացքում, ընտրություններն «անթերի» անցկացրած համարող ԿԳՆ ներկայացուցիչը, կատարվածին մնաց անհաղորդ։ «Պեշկան» հավանաբար հրահանգ չուներ վերևից, թե նման իրավիճակ ստեղծվելու դեպքում որն է լինելու իր գործողությունը։ Եթե դա այդպես չէ, ապա հուսով ենք, որ ԿԳՆ-ն անպայման կարձագանքի ու կտա հարցի բացատրություն։ Հատկապես որ 64-ամյա, թոշակ ստացող տնօրենն իրավունք չուներ դարձյալ թեկնածություն դնելու, եթե կար այլ թեկնածու։

Արմինե Մկրտումյան