Ինչո՞ւ է Նալբանդյանը գնում հանդիպման, եթե Ադրբեջանը շարունակում է լարված պահել սահմանը․ քաղաքագետ

Քաղաքագետ Գագիկ Համբարյանը վստահեցնում է՝ Ադրբեջանի և Հայաստանի ղեկավարների հանդիպումներն ընդհանրապես, բացի խնդիրներից, ոչ մի դրական արդյունք չեն տալիս։

Նա NEWSPRESS.am-ի հետ զրույցում ափսոսանք է հայտնում այն բանի համար, որ ՀՀ արտգործնախարար Էդվարդ Նալբանդյանը գնացել է այդ եռակողմ հանդիպմանը։

«Իհարկե, հասկանում եմ, որ մեր գործընկեր Ռուսասատանի Դաշնությունն է այդ հանդիպումը կազմակերպել՝ ի դեմ արտգործնախարար Լավրովի, բայց հայկական կողմն այսօր առավոտյան ժամը 9-ին հերթական զինծառայողի սպանությունից հետո, պետք է հրաժարվեր Մահմեդարովի հետ հանդիպելուց։ Էդվարդ Նալբանդյանը պետք է շատ արագ վերադառնար Հայաստան»,- նկատեց քաղաքագետը։

Ըստ նրա՝ այս ամենը հերթական անգամ ապացուցում է, որ Ադրբեջանը չի փոխում իր գործելաոճը։ Ամեն անգամ՝ կարևոր հանդիպումներից կամ իրադարձությունից առաջ, ադրբեջանական կողմը լարում է իրավիճակը շփման գծում։ Մեկ շաբաթվա մեջ այսօր արդեն խոսում ենք 2 զինվորի զոհվելու մասին։

Գագիկ Համբարյանի որակմամբ՝ մեկ շաբաթվա մեջ 2 զինծառայող կորցնելը մեծ «շռայլություն» է մեր ազգի և պետության համար։

«ՀՀ պաշտպանության նախարարությունը պետք է պատասխան տա զինվորների մահվան կապակցությամբ և ասի, թե ինչ քայլեր է ինքը ձեռնարկում։ Սա մեկ և 2-րդ, եթե մեկ շաբաթ է՝ պարզ էր, որ պետք է տեղի ունենա Նալբանդյան-Մահմեդյարով հանդիպումը Լավրովի միջնորդությամբ, ապա մեր արտգործնախարարն ինչի՞ համար է գնում հանդիպման, եթե ադրբեջանական կողմը շարունակում էր իր մեթոդներով ճնշում գործադրել Հայաստանի վրա»,- նկատում է մեր զրուցակիցը, ում գնահատմամբ հանդիպումն անիմաստ է։

Ինչ վերաբերում է այդ հանդիպման արդյունքներին, ապա քաղաքագետը ոչ մի լավ բան չի ակնկալում։

«Ինչպես նշեցի, ադրբեջանական կողմն իր գործելաոճից դուրս չի գալիս, ահաբեկչական պետություններին բնորոշ քայլեր է կատարում, և այս հանդիպումից առաջ հերթական խայծն էլ զինծառայողին սպանելն էր, որն ապացուցում է, որ ադրբեջանական կողմի հետ բանակցություններ վարելն ավելորդ է։ Մենք ադրբեջանական կողմին պետք է շեշտակի և ցավագին հարվածներ տանք, այդ պատասխանը պետք է տան Հայաստանի պաշտպանության նախարարությունն ու Արցախի պաշտպանության բանակը»,- նշում է Գագիկ Համբարյանը։

Նախ հանդիպումից առաջ արդեն տեղի ունեցող իրադարձությունները և լարումը շփման գծում ու զինծառայողների սպանությունը, ինչպես նաև Ադրբեջանի հռետորաբանությունը քաղաքագետին հույս չեն ներշնչում, որ բանակցությունները Հայաստանի համար ցանկալի արդյունք կգրանցեն։

Բացի այդ, Գագիկ Համբարյանը նկատում է, որ Ադրբեջանը ջանքեր չի խնայում, որպեսզի խուսափի Վիեննայում և Սանկտ-Պետերբուրգում Սարգսյան-Ալիև հանդիպումների ընթացքում ձեռք բերված համաձայնություններից։

«Դրական ակնկալիք Հայաստանը պետք է չունենա։ Եվ ընդհանրապես, ես գտնում եմ, որ այդպիսի հանդիպումներն էլ ավելի մեծ վնաս են տալիս գործընթացին․․․»,- եզրափակեց Գագիկ Համբարյանը։

Արմինե Մկրտումյան