Հա ի՞նչ անենք, դեպք ա, պատահել ա… Արարատ-Երևան գնացքի ուղևորները հրաշքով են փրկվել (ֆոտո)

Երևան-Արարատ-Երևան գնացքի ապակին օրերս, ընթացքի ժամանակ կոտրվել է: Այդ մասին NEWSPRESS.am-ին ահազանգեցին ականատեսները, ովքեր հրաշքով են փրկվել կոտրված ապակու բեկորներից և լուսանկարել այն:

Պարզելու համար, թե տեղյա՞կ է արդյոք «Հարավկովկասյան երկաթուղի» ՓԲԸ-ի ղեկավարությունը միջադեպի մասին և ի՞նչ է պատրաստվում անել, զանգահարեցինք ընկերություն: Պարզվեց, որ ղեկավարները վայելում են իրենց հանգստյան օրերը (weekend-ը), իսկ հերթապահ մասը պարզապես տեղյակ չէ կատարվածին: Հեռախոսավարուհին միացրեց ոմն Սերոբի հետ, ով չցանկացավ ասել իր պաշտոնն ու ազգանունը: Նա նույնիսկ տեղյակ չէր միջադեպի մասին:

Հարցին ի պատասխան` Սերոբը կանչեց ոմն Թորգոմի:

«Թորգոմ,- ձայն տվեց հեռախոսի մյուս ծայրից Սերոբը,- հլա արի ստեղ: Ասում են՝ երեկ շուշայա ջարդվե՞լ…,-ու հավանաբար ստանալով դրական պատասխան՝ կրկին հարցրեց,- բա էդ ո՞ր գնացքինն ա եղել…,- ապա, դառնալով մեզ` ասաց,- հա դե, դեպք ա, պատահել ա: Մենք ի՞նչ անենք, որ քար են նետել ապակու վրա:

Սերոբին ուղղում ենք՝ նշելով, որ ոչ թե քար են նետել, այլ ընթացքի ժամանակ է կոտրվել: Նա դարձյալ ճշտումներ է անում Թորգոմի հետ: «Հա դե, ի՞նչ անենք, տեխնիկական խնդիր ա, պատահել ա…»:

Հարցնում ենք՝ Սերոբ ջան, ըստ Ձեզ՝ նորմա՞լ է, որ ապակին ընթացքի ժամանակ ջարդվել է ու ընկել ուղևորի վրա, և նա հազիվ է հասցրել տեղից վեր կենալ:

Պատասխանում է. «Բայց, հո չի՞ վիրավորվել, չէ՞… վիրավորներ չկան… մաշնի պագրիշկեն չի պայթո՞ւմ…. Տեխնիկական խնդիր ա եղել ա…»:

Հարցնում ենք. «Եթե ընթացքից է ջարդվել, հնարավո՞ր է, որ մինչ այդ արդեն վնասված է եղել, ու չէ՞ր կարելի արդյոք կանխել դեպքը: Ո՞վ է զբաղվում Ձեր նշած տեխնիկական հարցով:

«Արդեն զբաղվել են, շուշեն փոխել են…»,- պատասխանում է:

Հասկանալով, որ այլևս անիմաստ է շարունակել Սերոբի հետ զրույցը՝ շնորհակալություն հայտնեցինք և անջատեցինք հեռախոսը:

Կարծում ենք՝ մեկնաբանություններն ավելորդ են:

Հարկ ենք համարում նկատել, որ այս գնացքն ամեն առավոտ Արարատից մեկնում է Երևան և երեկոյան վերադառնում: Ասել է թե՝ երկու անգամ ուղևորներ է փոխադրում, որոնց անվտանգ փոխադրումը, մեղմ ասած, երաշխավորված չէ:

Հիշեցնենք, որ դեռ 2013 թվականին «Հարավկովկասյան երկաթուղի» ՓԲԸ-ի Ուղևորափոխադրումների տնօրինության պետ Գագիկ Մովսեսյանն ասուլիսներից մեկի ժամանակ խոսում էր երկաթուղու մոդեռն սպասարկման մասին: Նա նշել էր, որ տեսանելի ապագայում կգործեն «էլեկտրագնացքներ, որոնց ննջավագոններում և բարձր հարմարավետության կուպեներում կգործի անվճար Wi-Fi կապ»…

Մինչ օրս նշված «ապագան տեսանելի չէ…»: Ավելին՝ եղած վագոններն այսօր պահպանման խնդիր ունեն, ինչի հետևանքով մեր զրուցակից Սերոբի նշած տեխնիկական խնդիրները սովարականից ավելի հաճախակի են լինում:

Էստեղ են ասել՝ վա՛յ մեր քաչալ գլխին… Ամպագոռգոռ հայտարարություններից ու խոստումներից առաջ նախ հարկավոր է մտածել, թե ինչպես կանխարգելել երկաթուղու դժբախտ պատահարներն ու նվազեցնել դրանց թիվը:

Այնպես որ՝ այս բարձիթողի վիճակի ֆոնին արդեն նույնիսկ զարմանալի չեն թվում Սերոբի անպատասխանատու վերաբերմունքն ու մեր հարցերին տրված անփույթ պատասխանները:

Մյուս կողմից էլ Թորգոմն ու Սերոբը մեր երկիրը ղեկավարող թորգոմների ու սերոբների մարմնավորումն են:
Եթե վերևներում աշխատում են իրենց գործի նկատմամբ սրտացավություն չունեցող մարդիկ, ովքեր երկաթուղին դիտարկում են միայն որպես եկամտի աղբյուր, ապա նրանց ենթակաների անտաբերությունից պետք չէ զարմանալ: Մարդիկ աշխատում են ու փող ստանում, իսկ տեխնիկական խնդիրները թո՛ղ գնան գրողի ծոցը:

Ինչ վերաբերում է երկրի հին ու նոր իշխանության կողմից խոստացված առաջընթացին ու անվտանգությանը, ապա դրանք այլևս անցյալում են:

Արմինե Մկրտումյան