Սպասվում է Արդարադատության անարդար նախարա՞ր

Մամուլում տեղեկություն կա, որ ՀՀ արդարադատության նախարար Արփինե Հովհաննիսյանին փոխարինող են փնտրում, և կարծես թե կանգ են առել նախկին Գլխավոր դատախազ Գևորգ Կոստանյանի թեկնածության վրա:

Թեև Արփինե Հովհաննիսյանի նշանակումը որոշ հետաքրքիր հարցեր առաջ քաշեց, այնուամենայնիվ, դրական վերաբերմունք կար երիտասարդ կադրի նկատմամբ, ով նաև գիտակ էր օրենքներին և կարող էր բանավիճել` պաշտպանելով իր տեսակետը:

Ինչ վերաբերում է Գևորգ Կոստանյանի նշանակմանը՝ նշենք, որ նախկին Գլխավոր դատախազը շատ անգամ է աչքի ընկել անտեղյակությամբ և օրենքների չիմացությամբ, և եթե նրա նշանակումն Արդարադատության նախարարի պաշտոնում իրականություն դառնա, ապա այն հետքայլ է արդարադատության ոլորտում. Մեկ հարց է՝ ոլորտը ղեկավարի բանիմաց իրավաբանը, մեկ այլ հարց է` Գևորգ Կոստանյանը:

Որպեսզի ձևակերպումները մերկապարանոց չհնչեն, հիշեցնենք, որ Գլխավոր դատախազ աշխատելու տարիներին Գ. Կոստանյանն անգամ չէր կարողացել ինչպես հարկն է ներկայացնել Վարդան Պետրոսյանի գործի ընթացքը, գործ, որն այդ շրջանում ամենաքննարկվող թեման էր: Վարդան Պետրոսյանի գործով Վճռաբեկ դատարանն անգամ բողոքը վերադարձրեց, այսինքն՝ Վարդան Պետրոսյանի դատավճիռը մտավ օրինական ուժի մեջ»:

Հիշեցնենք, որ Վարդան Պետրոսյանի գործով կողմերից ոչ մեկը մինչ այդ պահը չէր դիմել Վճռաբեկ դատարան, և չէր բողոքարկվել Վերաքննիչ դատարանի որոշումը:

Հաջորդ օրինակը, երբ Սուրիկ Խաչատրյանի` Լիսկայի որդու մասնակցության միջադեպի վերաբերյալ հարց են տվել, պատասխանել է, որ նյութերը կպահանջեմ և այդ ժամանակ կտեսնեմ, թե ով ինչ քննություն է արել. դա այն դեպքում, երբ նա ի պաշտոնե պետք է տեղյակ լիներ և′ գործի ընթացքին, և′ նյութերին:

Իսկ Գևորգ Կոստանյանի՝ օրենքների չիմացությունը պատճառ էր դառնում, որ հակադարձեր՝ դուք իրավաբան չեք, այն դեպքում, որ ինքն էլ չէր կարողանում իրավական հարցերի պատասխանել, կամ գոնե տեղյակ լինել:

Երբ Կոստանյանից հետաքրքրվել էին «Նաիրիտի» 30 մլն դոլարի թալանի վերաբերյալ, որը ոչ միայն ժամանակին ներկայացվել էր Ազգային ժողով, նաև մամուլում բազմիցս հրապարակումներ էին եղել, նա պատասխանել էր, որ թերթում գրելը դեռևս գործ հարուցելու համար հիմք չէ: Եվ այսպես շարունակ:

Եվ եթե Գևորգ Կոստանյանի նշանակումն Արդարադատության նախարարի պաշտոնում իրականություն է, ապա պրոֆեսիոնալիզմին, արդարության հաստատմանը հանրությունը դեռ երկար կսպասի կամ էլ կրկին Կոստանյանին պետք է ուղարկել իրավաբանական դասընթացների` օրենքներ սովորելու համար:

NEWSPRESS.am