Դաշնակցական ԿԳ նախարարն սկսել է իր գլխից վերև թռչել (լուսանկարներ, տեսանյութ)

Երևանի թիվ 17 հատուկ դպրոցի ցուցանակի հենց ներքևում այս օրերին տեղ է գտել ևս մեկը՝ «Պահանջում ենք արդարություն»:

Այս կերպ դպրոցի ուսուցչական անձնակազմն իր բողոքն է արտահայտում Կրթության և գիտության նախարարի նկատմամբ, ում թեթև ձեռքի շնորհիվ դպրոցում անօրինական ճանապարհով նշանակվել է տնօրեն:

«Երևանի հենաշարժական համակարգի խախտումներ ունեցող երեխաների թիվ 17 հատուկ դպրոցի» նախկին տնօրեն Ամալյա Հարությունյանն անցել է թոշակի, որից հետո ԿԳՆ-ն տնօրենի թափուր տեղի համար հայտարարել է մրցույթ: Սակայն, ուսուցիչների պատմելով, մրցույթն այդպես էլ չի անցկացվել, քանի որ նախարարության կողմից նշանակված ներկայացուցիչը մրցույթին չի եկել մասնակցել:

Թեկնածուներից Հայարփի Մինասյանի փաստաբան Էդուարդ Աղաջանյանը նկատում է, որ ըստ սահմանված օրենքի՝ մրցույթը կարելի էր չեղյալ համարել, եթե չի ներկայանում թեկնածուներից որևէ մեկը, իսկ նախարարության ներկայացուցչի բացակայությունը չէր կարող խոչընդոտել մրցույթը, և այն պետք է անցկացվեր:

Նախարարության ներկայացուցիչը չի եկել մրցույթին նաև երկրորդ և երրորդ անգամ, որից հետո նախարարը մրցույթը չեղյալ է համարել և նշանակել իր մարդուն՝ այս դեպքում Վերգինե Եսայանին, ով հանդիսանում է ԿԳ նախարար Լևոն Մկրտչյանի՝ ՀՅԴ-ական խորհրդական, նախկին պատգամավոր Բագրատ Եսայանի կինը:

Այս նշանակումն անմիջապես բողոքարկվել է մյուս թեկնածուի՝ Հայարփի Մինասյանի կողմից և մտել վարչական դատարան, ու չնայած դրան՝ նախարար Մկրտչյանը շուտափույթ որոշում է կայացրել և հրաման գրել Վերգինե Եսայանի նշանակման մասին:

Այլ կերպ ասած՝ նախարարը միանձնյա որոշում է կայացրել, ինչի իրավունքը չուներ:

«Գործն արդեն վարչական դատարանում է, բողոքարկել ենք մրցույթի արդյունքները, բայց, այդուհանդերձ, նախարարն անմիջապես նշանակման հրաման է գրել, ինչի իրավունքը չուներ. նա քաջատեղյակ էր, որ գործը գտնվում է դատարանում, բայց շուտափույթ կերպով հաստատել է հրամանը, ու էստեղ հարց է առաջանում, թե ինչո՞ւ է այդքան շտապել ու արագ որոշում կայացրել»,-NEWSPRESS.am-ի հետ զրույցում ասաց Հայարփի Մինասյանի գործով փաստաբան Էդուարդ Աղաջանյանը:

Մյուս փաստաբան Վահագն Գասպարյանն էլ նկատեց, որ պատրաստ են նախարարի հիշյալ հրամանը վիճարկել:

«Այդ հրամանը դեռևս փաստաթղթային տեսքով չունենք, բայց կունենանք ու վիճարկելու ենք դատարան: Արհեստական խոչընդոտներ ստեղծելով՝ փորձում են վարչարարություն իրականացնել, բայց դա, բնականաբար, ոչ իրավաչափ է և չի համպատասխանում գործող օրենսդրությանը: Հետևաբար՝ դատարանը պետք է համապատասխան գնահատական տա»,-նկատեց Վահագն Գասպարյանը:

Ուսուցչական կոլեկտիվը ևս դեմ է կատարվածին. նրանք պահանջում են վերանայել նախարարի որոշումը և անցկացնել նոր մրցույթ, որը հնարավորություն կտա ոչ թե նշանակել, այլ արդար ճանապարհով ընտրել տնօրեն:

«Մենք Վերգինե Եսայանի դեմ ոչինչ չունեք, ուղղակի արդարություն ենք պահանջում: Ի՞նչ ենք սովորեցնում այսօր մենք մեր երեխաներին, եթե նման անօրինական ճանապարհով է տնօրեն նշանակվում…»,-վրդովված և իրար հերթ չտալով՝ ասում էին ուսուցիչները:

Բացի այդ, նրանք նշեցին նաև, որ խորհրդի նախագահ Ռուզաննա Գրիգորյանը ևս պատվեր է կատարում:

«Եթե նա արդար է, ապա ինչո՞ւ չի մասնակցում մեր բողոքներին կամ որևէ կերպ արձագանքում դրան: Սուսիկ-փուսիկ նստել է: Ինչո՞ւ չի գալիս մեզ հետ պայքարելու արդար մրցույթի համար: Ի՞նչ է, նա անելիք չունի՞»,-նկատում են ուսուցիչները:

Այս դեպքում հարկ է հիշել իմաստուն խոսքը, թե մինչև չգա հետինը, նախորդը չի հիշվի: Դաշնակցական նախարարն սկսել է իր գլխից վերև թռչել, ու նախարարությունն էլ ավելի մխրճել կոռուպցիայի մեջ:
Նախարարի «շնորհիվ» այստեղ ստեղծվել է մի վիճակ, որտեղ մուտք ունեն միայն յուրայինները, թեկուզ դրա համար օրենք շրջանցվի:

Հարկ է նկատել, որ կոռուպցիան՝ դիրքի չարաշահումն ու օրինականությունը, պոզով-պոչով չեն լինում: Այն լինում է հենց այնպիսին, ինչպիսին ներկայացվել ու դրսևորվել է դաշնակցական նախարարի կողմից:
Բա լավ դաշնակցական ընկերներն էլ ինչի՞ համար են, եթե նեղ օրվան օգնության չեն հասնելու և մերձավորների հարազատներին գործով չեն ապահովելու:

Այս դեպքում էլ, փաստորեն, Լևոն Մկրտչյանը, չարաշահելով իր դիրքը, հավանաբար ուզում է դուրս գալ Բագրատ Եսայանի կողմից ինչ-որ ժամանակ արված լավության տակից: Ի դեպ, դա այն նույն Բագրատ Եսայանն է, ով հայտարարում էր, թե «Դաշնակցությունը որևէ վարչական լծակ չի օգտագործում՝ հարցեր լուծելու համար» և մի ժամանակ հենց ինքն էր, իբր, պայքարում կոռուպցիայի դեմ: