Ինչո՞ւ Հայաստանում կոռուպցիա չկա

Հայաստանում կոռուպցիա չկա, ոչ էլ կաշառակերություն, սակայն երկիրը չի համարվում կոռուպցիայից զերծ երկիր: Կոռուպցիա չկա, որովհետև այն մեր կյանքի մի մասն է, այնքան ենք սերտաճած այս երևույթին, որ արդեն տարբերակել` որտեղ է կոռուպցիան և որտեղ՝ ոչ կոռուպցիան, դժվար է:

Օրինակ` փող են տալիս, ազատում են բանակից, ոստիկանությունից, դատարաններից, փող են տալիս կամ մեկ զանգով ընդունում են բուհեր, աշխատանքի, պաշտոնի: Օգտագործում են վարչական ռեսուրսը՝ սեփական ընկերությունները ֆինանսավորելու, սնունդ կամ այլ ապրանքներ պետական մարմիններ մատակարարելու, միայնակ ներկրելու, միայնակ իրացնելու համար:

Օգտվելով պաշտոնեական դիրքից՝ յուրացնում են պետական բյուջեի միջոցները, օգտվում են տրամադրված ֆինանսներից, «վերցնում» են դրամաշնորհներից, վարկերից մասնաբաժին: Դարձյալ օգտվելով տրամադրված ֆինանսական միջոցներից՝ յուրացնում են ներքին օղակներին հասանելիք տրանսպորտի կամ կեցության գումարները, յուրացնում լրացուցիչ հասանելիք գումարների մի մասը:

Խոշորագույն վարկային ծրագրերի հետևում կանգնած են իշխանությանը մերձ անձինք, որոնք յուրացնելով միլիոնավոր դոլարներ՝ ներքին օղակներին դնում են անհարմար վիճակի մեջ` չեն կառուցվում կամ կցմցվում են ճանապարհներ, չեն վերանորոգվում կամ կցմցվում են դպրոցներ, չեն կառուցվում կամ կցմցվում են ոռոգման համակարգեր:

Եթե որևէ կարևոր ծրագիր խանգարում է ինչ-որ մեծահարուստի, ապա նա կարողանում է «ազատ» միտինգների միջոցով շրջանցել խնդիրը, կամ եթե պաշտոնյաները մրցակցում են, ապա օգտագործում են հանրային ուժերը՝ ազատ խոսքի իրավունք կամ բնապահպանություն խաղալով:

Կարող ենք ընտրությունները չներկայացնել՝ այն ավելի քան բացահայտ կոռուպցիոն ձև է, դասական օրինակ. երևի ինչ-որ ժամանակ հայկական ընտրությունները որպես կոռուպցիայի դասագրքային օրինակ կդիտարկեն:

Ամփոփենք.

Այս իրավիճակում ո՞վ կհամարձակվի բացահայտել որևէ կոռուպցիոն գործարք՝ իհարկե, ոչ ոք, ինչպես ասում են` անմեղներ չկան: Կա′մ մեղավոր են, կա′մ կապված են մեղավորների հետ, կա′մ հափշտակել են, կա′մ հափշտակողների կողքին են եղել, և այսպես Հայաստանում որևէ կոռուպցիոն գործարք չի բացահայտվում, արդյունքում` կոռուպցիա չկա, չի բացառվում, որ չի էլ եղել:

Միայն նշենք, որ ոչ կոռուպցիոն Հայաստանը չունի «բիրդան» աղաների, միլիոնատերերի, անգամ միլիարդատերերի խնդիր: Հավելենք նաև, որ երկրից վերջին տարիներին անօրինական դուրս է բերվել 10 մլրդ դոլար, և չկա որևէ մեկը, որ հարցնի` ինչո՞ւ և ո՞վ է պատասխանատու:

Իսկ մինչ այդ Հայաստանը համարվում է ոչ կոռուպցիոն երկիր․․․

NEWSPRESS.am