«Կարևորը՝ մեր կամքն ամուր է»․ սփյուռքահայերի հերթական ակցիան՝ հաջակցություն «Սասնա ծռերի» (տեսանյութ)

«Չարախոսելու փոխարեն միանանք և օգտակար լինենք «Սասնա ծռերին»»։ Այս կոչով են դիմում համայն հայությանը Լոս Անջելեսում ստեղծված նախաձեռնող խմբի անդամները։

NEWSPRESS.am-ն ավելի վաղ տեղեկացրել էր, որ նախորդ տարի «Սասնա ծռեր» խմբի կողմից Երևանում ՊՊԾ գնդի գրավումից հետո, Լոս Անջելեսում նոյեմբերին ստեղծվել է նախաձեռնող խումբ՝ հաջակցություն «Սասնա ծռերի»:

Վերջիններս ոչ միայն պահանջում են ազատություն տալ «Սասնա ծռերի» կալանավորված անդամներին, այլև օգնել նրանց ու նրանց ընտանիքներին։

Խմբի անդամների դիտարկմամբ՝ ցանկացած մարդ, ով իրեն հայ է համարում, միայն խոսքով չէ, որ պետք է աջակցի «Սասնա ծռերի» տղաներին։

Նախաձեռնողներից Արաքսյա Գրիգորյանը նկատում է՝ հայ լինել նշանակում է՝ ապրել Հայաստանով ու նրա խնդիրներով։ Այսօր, որպես այդպիսին, նախաձեռնող խմբի անդամները տեսնում են երկրում ահագնացող արտագաղթը, տնտեսական ծանր վիճակն ու օրըստօրե ավելացող աղքատությունը։

Որպես հայրենիքի համար սրտացավ մարդիկ՝ սփյուռքահայության այս ստվար հատվածը փորձում է գործով ցույց տալ, որ իսկապես մտահոգ է իր ազգի ու հայրենիքի ճակատագրով։

Ողջունելով ժողովրդին ծանր վիճակից հանելու՝ «Սասնա ծռերի» գործողությունները՝ այսօր արդեն նրանք կոչով դիմում են բոլորին՝ աջակցել տղաներին, ովքեր մտահոգված են ազգի ճակատագրով։

Նախաձեռնող խմբի անդամները կազմակերպել են դրամահավաք՝ վաճառքի հանելով իրենց սեփական իրերն ու այն ամենը, ինչից կարելի է գումար ստանալ, որպեսզի փոխանցեն «Սասնա ծռերին»:

«Ողջունում ենք բոլորին, ովքեր նեցուկ են մեր գործին։ Պետք է շարունակենք պայքարել՝ թեկուզ հեռվից․․․»,-ասում են նախաձեռնող խմբի անդամները։ Նրանցից մեկը նկատում է՝ շատ շոգ է, դժվար է առավոտից մինչ երեկո կանգնել արևի տակ ու առևտուր անել, բայց այն, որ հանգանակությունը կարևոր գործի համար է, իրենց արդեն ուժ է տալիս։

«Կարևորը՝ մեր կամքն ամուր է»,-նկատում է խմբի անդամներից մեկը՝ նշելով, որ տղաներին սատարելու են ոչ միայն գումարով, այլև գործով։

«Մենք ուրիշ մեծ գործեր պետք է անենք։ ժամանակն է խոսքից գործի անցնել․․․Մենք «Սասնա ծուռ» ենք»։

Տեսանյութն՝ այստեղ