Նախկին պատգամավոր Արսեն Ավագյանը՝ Տուգոն իր աղջկան չի առևանգել (լուսանկարներ, տեսանյութ)

ՀՀ ԱԺ նախկին պատգամավոր Արսեն Ավագյանի ( հայտնի է Տուգո մականվամբ) անվան շուրջ ինտրիգ է հասունացել:

Վերջինիս նախկին կինը՝ 34-ամյա Լուսինե Ավագյանը ու նրա մայրը հաղորդում են տվել Նոր Նորքի ոստիկանություն առ այն, թե իբր Արսեն Ավագյանն առևանգել է իր աղջկան՝ 7-ամյա Քրիստինային:

Այս մասին լուրը NEWSPRESS.am-ը փորձեց ճշտել Արսեն Ավագյանի փաստաբանից՝ Գայանե Լյուդվիգյանից:

Փաստաբանը, ներկայացնելով կատարվածըմ պատմեց, որ երեկ՝ հունիսի 3-ին, Արսեն Ավագյանը պատահական երեխային տեսնում է խաղալիս: Նա մոտենում է աղջկան և գրկում նրան: Երեխան ուրախ փաթաթվում է հորը: Աղջկա և հոր հանդիպմանը այդ ժամանակ փորձում են խոչընդոտել Լուսինեի ծնողները, ովքեր մոտենալով նրանց՝ արգելում են Արսեն Ավագյանին շփվել աղջնակի հետ: Այդ ժամանակ Ավագյանն առանց երկար-բարակ մտածելու, ինքնաբուխ գրկում է երեխային ու նստեցնում իր մեքենան: Լուսինեի հայրն արագ մոտենում է մեքենային ու ինքնապաշտպանության համար նախատեսված արցունքաբեր գազ է փչում մեքենայի մեջ, որից վնասվում է Արսեն Ավագյանի տեսողությունը:

Լուսինեի հայրը փաստորեն անտեսել է այն հանգամանքը, որ այդ նույն գազից կարող էր վնասել նաև թոռնուհուն, ով արդեն նստած է եղել մեքենայի մեջ: Նկատենք, որ այդ գազն առաջացնում է հազ, սրտխառնոց, ժամանակավորապես տեսողության կորուստ և դժվարացնում է շնչառությունը: Ու չնայած այդ ամենին՝ նա վտանգի է ենթարկել նաև 7-ամյա Քրիստինային:

Ամեն դեպքում, Արսեն Ավագյանին հաջողվում է երեխային տանել իր տուն:

«Այժմ երեխան Արսեն Ավագյանի մոտ է, բայց այստեղ մարդուն առևանգելու հանցակազմի գործողություններ չկան, քանի որ նա, ինչպես և մայրը, երեխայի ծնողն է և, օրենքով սահմանված կարգով, ծնողներն ունեն հավասար իրավունքներ ու պարտավորություններ երեխայի նկատմամբ: Հատկապես Քր. օրենսգրքի 131 հոդվածի հատկանիշներ չի պարունակվում և հաղորդմանն ընթացք չի տրվի»,-ասում է փաստաբան Լյուդվիգյանը, ում խոսքով մինչ այդ Արսեն Ավագյանն իր աղջկան չէր տեսել շուրջ մեկ տարի:

Նկատենք, որ այս պահին երեխայի բնակության վայրը որոշելու մասին գործը քննվում է Կենտրոն և Նորք-Մարաշ վարչական շրջանների ընդհանուր իրավասության դատարանում. դատաքննությունը նախապատրաստական փուլում է:

Մինչ այս նախկին պատգամավորը տարբեր միջոցներով՝ գրավոր, բանավոր, էլեկտրոնային ու ինտերնետային տարբերակներով, բազմիցս փորձել է Լուսինե Ավագյանի հետ համաձայնության եզրեր գտնել՝ աղջկան տեսակցելու առաջարկության շուրջ: Սակայն վերջինս անընդհատ մերժել է ամուսնուն՝ միևնույն ժամանակ դատարանին ներկայացնելով, թե իբր ինքը չի խոչընդոտում հանդիպմանը:

Լուսինե Ավագյանը, վայբեր-կապի միջոցով փորձել է բանակցել Արսեն Ավագյանի հետ՝ երեխային տեսակցելու հարցի շուրջ՝ առաջ քաշելով գույքային պահանջներ: Դրանից հետո, Լուսինեն իր 7-ամյա աղջկան երկրից գաղտնի դուրս է տարել: 2016-ին, ամբողջ մեկ ամիս, Քրիստինան գտնվել է օտար մարդկանց խնամքի տակ՝ առանց մոր ներկայության: Երեխայի անհետացման պահից բանակցությունները դադարեցվել են:

«Այդ ընթացքում Լուսինեն միայնակ եկել է Հայաստան, երեխային մեկ ամիս թողնելով չգիտենք որտեղ, ում մոտ ու ինչ պայմաններում, դիմում գրել, որ երեխային դպրոցից ազատի և կրկին մեկնել է»,-ներկայացնում է փաստաբանը:

Երեխայի՝ Հայաստան վերադառնալուց հետո, Լուսինեն, որոշ պահանջների դիմաց, առաջարկել է Արսենին հանդիպել երեխայի հետ՝ իր հայրական տանը: Այս առաջարկը մերժվել է Արսեն Ավագյանի կողմից, քանի որ բացի այն, որ բնակարանը փոքր է ու անհարմար աղջկա հետ հանդիպման համար, հանդիպումը պետք է լիներ Լուսինեի ու նրա ծնողների ներկայությամբ, ովքեր անհիմն սուտ հայտարարություններ են տվել Արսեն Ավագյանի վերաբերյալ, թե իբր նա սպառնում է իրենց:

Ընդունվել է Արսեն Ավագյանի կողմից առաջ քաշված վայբեր-կապով շփման առաջարկը, որը սակայն իրականում չի գործում: Ամեն անգամ, երբ հայրը զանգում է, մայրը տարբեր պատճառաբանություններով, հեռախոսը երեխային չի փոխանցում:

«Մենք նույնիսկ դատարան ենք դիմել երեխայի տեսակցության կարգ սահմանելու միջնորդությամբ, բայց դատարանը մերժել է քանի որ հայցի ապահովվման սահմաններում դատարանը նման լիազորություն չունի՝ մինչև դատական ակտ կայացնելը»,-ասում է Գայանե Լյուդվիգյանը:

Նրա խոսքով՝ ըստ էության դատական ակտով կորոշի երեխայի բնակության վայրը, թե նա որտեղ կապրի, բայց մինչ այդ երեխան պետք է գտնվի այնտեղ, որտեղ իրեն լավ է զգում:

«Կարծում եմ՝ նորմալ է, որ երեխան կարող է ապրել հոր մոտ՝ մինչև դատական ակտը, հատկապես որ երեխան շատ լավ է զգում իրեն: Երեխան կարոտել էր հորը, իր սենյակը, իր խաղալիքները… Քրիստինան շատ ուրախ է, որ հոր մոտ է»:

Ներկայացնում ենք լուսանկարներ և տեսանյութ, որտեղ Քրիստինան ուրախ ու անհոգ խաղում է իր սիրած խաղալիքներով՝ Արսեն Ավագյանի տանը:

Տեսանյութ.