Դիմում-բողոք՝ վարչապետին

Ա/Ձ «Հակոբ Հրանտի Նազարի-Դեխնավի»
Պետական ռեգիստրի վկայական թիվ 01 Ա 104542
Անձ.`AK0418982, տրվ.18.01.2010 թ., 001-ի կողմից
Հասցե` ք.Երևան, Երզնկյան փողոց, 50 տուն
Հեռախոս` 077.74-58-23

ԴԻՄՈՒՄ-ԲՈՂՈՔ

Մեծարգո Պարոն Վարչապետ.

Հայտնում Ձեզ, որ հանդիսանում եմ գործարար: Իմ ղեկավարությամբ գործում է «Հակոբ Հրանտի Նազարի-Դեխնավի» Ա/Ձ-ն: 2011 թ-ի մարտի 29-ին հաղթող եմ դարձել «ԱԿՍՈՆ» ապրանքահումքային բորսայի կողմից կազմակերպված «ՀԿԵ» ՓԲԸ-ի տրամադրած թվով 72 մարդատար վագոնների վաճառք-մրցույթում:

Վաճառքի ընդհանուր գումարը կազմել է 108.000.000 ՀՀ դրամ և ինձ տրվել է թիվ 49 գործարքի վկայականը:

Սահմանված կարգի համաձայն կատարել եմ նախնական գումարային վճարումները, որից հետո 26.04.2011թ-ին որպես Գնորդ «ՀԿԵ» ՓԲԸ-ի հետ կնքել ենք НЮ-КП 138/11 հիմնական առուվաճառքի պայմանագիրը, որի կատարման վերջնաժամկետ է սահմանվել 30.09.2011 թ․:

Վերը նշված պայմանագրով նախատեսված պարտականությունները ես, իմ կամքից անկախ աննշան թերություններով, կատարել եմ ամբողջությամբ և ժամանակին: Վաճառող կազմակերպությունն իմ մեղքով որևէ վնասներ չի կրել, ինչպես նաև վնասներ կրելու առաջ երբևէ չի կանգնել:

Չնայած իմ թափած հսկայական ջանքերին՝ «ՀԿԵ» ՓԲԸ-ի և նրա հետ համագործակցող «ՋԻ ԷՄ ԷԼ ԳՐՈՒՊ» ՍՊԸ-ի և «Գեղարվեստագործ» ԱԿ-ի անկանխատեսելի խարդավանքների և մեքենայությունների պատճառով ես կորցրել եմ հսկայական ֆինանսական միջոցներ և 72 մարդատար վագոնները:

Իմ օրինական շահերը պաշտպանելու և նշված կազմակերպությունների պաշտոնատար անձանց կողմից թույլ տրված ակնհայտ օրինախախտումների պատճառով, որոնցից մեծ մասը դրսևորվել են հանցագործության տեսքով, դիմել եմ պատկան մարմիններին, սակայն որևէ հաջողության չեմ հասել, քանի որ նրանց գործողությունները հովանավորվել են պետական բարձրաստիճան պաշտոնատար անձանց կողմից:

Մասնավորապես՝ իմ դիմում-բողոքները, հաղորդումները և հայտարարությունները մերժվել են իրավապահ մարմինների կողմից, ներկայացված հայցապահանջները նույնպես անհիմն մերժվել են դատավորների կողմից կայացված վճիռներով և այլ դատական ակտերով և ըստ էության բոլոր անհիմն ակտերը ստացել են օրինական ուժ:

Այդ ամբողջ ընթացքում հիշյալ կազմակերպությունների պաշտոնավարող անձանց կողմից ստեղծվել և օգտագործվել են բազմաթիվ կեղծ փաստաթղթեր, որոնք պատկան մարմինների կողմից օբյեկտիվ գնահատականի չեն արժանացել:
Ներկա պահին տեղի ունեցած պետական մարմինների ղեկավար անձանց դրական փոխհարաբերությունները և արդարացի գործելակերպը իմ մոտ հույս և հավատ է արթնացրել, որ կրկին անգամ իմ կողմից բարձրացված բողոքը կարող է օրինական և արդարացի լուծում գտնել:

Ձեզ տեղյակ եմ պահում նաև, որ նախկին վարչապետ Աբրահամյանին դեռևս 2014 թ․ նույնպես դիմել եմ միջոցներ ձեռնարկելու խնդրանքով, սակայն առ այսօր որևէ պատասխան չեմ ստացել հասկանալի պատճառներով՝ չէ որ ես չէի կարող համեմատվել նախկին նախարար Գագիկ Խաչատրյանի կամ «ՀԿԵ» ՓԲԸ տնօրեն պարոն Շայդուլինի հետ:
Սույն դիմում-բողոքում իմ կողմից նկարագրած փաստերը բացարձակ իրականություն են: Պատրաստակամ եմ սույն դիմում-բողոքի համապատասխան ընթացքի դեպքում վարույթն իրականացնող մարմիններին տալ համապատասխան բացատրություններ և ներկայացնել նշածս փաստերը հիմնավորող փաստաթղթեր և իրեղեն ապացույցներ:

Կից ներկայացնում եմ թիվ 49 գործարքի վկայականի, պայմանագրի, Հ.Աբրահամյանին նախկին ուղղված դիմում-բողոքի պատճենները:

Ա/Ձ «Հակոբ Հրանտի Նազարի-Դեխնավի»

Տնօրեն` Հակոբ Հրանտի Նազարի-Դեխնավի

05.06.2017թ.