Սերժ Սարգսյանն Աստանայում մասնակցել է «Ապագայի Էներգիա» խորագրով ցուցահանդեսի բացմանը

Աշխատանքային այցով Ղազախստանի Հանրապետություն ժամանած Նախագահ Սերժ Սարգսյանն այսօր երեկոյան հյուրընկալող երկրի նախագահ Նուրսուլթան Նազարբաևի, Աստանա այցելած այլ երկրների պատվիրակությունների ղեկավարների հետ «Համագումարների» կենտրոնում ներկա է գտնվել «Ապագայի էներգիա» խորագիրը կրող «Աստանա Էքսպո 2017» միջազգային մասնագիտացված ցուցահանդեսի բացման պաշտոնական արարողությանը:

Մինչ այդ Նախագահ Սարգսյանը հյուրընկալվել է ցուցահանդեսային համալիրում, որտեղ մասնակից երկրների պատվիրակությունների ղեկավարների արարողակարգային համատեղ լուսանկարահանումից հետո, այցելել է «Նուր-Ալեմ» կոչվող կենտրոնական տաղավար, որից միևնույն հեռավորության վրա տեղակայված են բոլոր ազգային տաղավարները:

Էներգիայի այլընտրանքային աղբյուրներին և «կանաչ» տեխնոլոգիաներին նվիրված ցուցահանդեսում մասնակից երկրները ներկայացնում են էներգախնայողության համաշխարհային լավագույն տեխնոլոգիաները, էներգիայի այլընտրանքային աղբյուրների օգտագործման բնագավառում առկա նորագույն մշակումները:

Երեկոյան տեղի կունենա նաև ցուցահանդեսի բացմանը նվիրված ընդունելություն: Տեղեկությունը տարածել է Հայաստանի նախագահի նստավայրը:

Ի դեպ, Աստանայի ցուցահանդեսին մասնակցում է նաեւ ՌԴ նախագահ Պուտինը: Հետաքրքիր է այն, որ Պուտինը մի քանի շաբաթ առաջ ստորագրել էր ՌԴ տնտեսական անվտանգության ռազմավարությունը, որում կանաչ տեխնոլոգիաների զարգացումը դիտվում է ՌԴ տնտեսությանը սպառնացող վտանգ: