Ես չգիտեմ մանր ձուկ, խոշոր ձուկ ասելով՝ դուք ինչ նկատի ունեք․ ՊԵԿ նախագահը՝ համակարգի կրճատումների մասին

«Զուտ կառուցվածքային փոփոխության արդյունքում ձևավորվել է նոր կառուցվածք, և դրա արդյունքում շուրջ 483 հաստիք կրճատվել է: Այդ մարդիկ չեն հեռացվել, կրճատվել են»։

Այսօր Ազգային ժողովում լրագրողների հետ զրույցի ժամանակ ասաց Պետական եկամուտների կոմիտեի նախագահ Վարդան Հարությունյանը՝ անդրադառնալով համակարգում ընթացող կրճատումներին:

Նրա խոսքով՝ տարիների ընթացքում ՊԵԿ-ի IT համակարգը վերազինվել է, և կրճատումները վաղ թե ուշ պետք է լինեին:

«Ես ձեզ ըսենց ասեմ՝ կրճատումների արդյունքում չեմ բացառում, որ կարող է լինեն նաև սուբյեկտիվ դրսևորումներ, որովհետև մեկ ամսվա մեջ այս ամբողջ աշխատանքներն իրականացնելն ու ավարտին հասցնելը, իհարկե, դժվար է եղել: Բայց էն աշխատակիցները, որոնք բարեխիղճ աշխատել են և այս ընթացքում միգուցե և դուրս են մնացել համակարգից, ամեն ամիս փոփոխություններ լինում են, և նրանք մեր տեսադաշտից դուրս չեն մնա»,-նշեց նա:

Ինչ վերաբերվում համակարգի աշխատակիցների ձերբակալություններին, ապա Վարդան Հարությունյանը դա դիտարկում է որպես կոռուպցիայի դեմ պայքար։

«Նորմալ է, եթե ինչ-որ մեկն իր աշխատանքի ընթացքում խախտում է լիազորությունները և լիազորություններից դուրս ինչ-որ գործառույթ է իրականացնում, պետք է ՀՀ գործող օրենքների շրջանակներում պետք է պատասխան տա», -նկատեց ՊԵԿ նախագահը:

Դիտարկմանը, թե խոշոր կոռուպցիոներները չեն պատժվում ու միայն մանր ձկներն են որսվում, ՊԵԿ նախագահը արձագանքեց.

«Ես չգիտեմ, մանր ձուկ, խոշոր ձուկ ասելով՝ դուք ինչ նկատի ունեք, համենայնդեպս կալանավորվում են… Եթե ունեք ինֆորմացիա, խնդրում եմ ներկայացրեք, և ձեր նշած մարդիկ նույնպես կկալանավորվեն»: