Ջրպետկոմի նախագահի երևակայությունը չի բավել սեփական սուտը հորինել

Վերջին երկու տարվա ընթացքում Սևանա լճի մակարդակի բարձրացումը փոքր-ինչ զգալի է, ինչն արդեն անհանգստացնող է Ջրային տնտեսության պետական կոմիտեի նախագահ Արսեն Հարությունյանի համար, և որոշվել է լրացուցիչ 100 մլն խմ լրացուցիչ ջրառ կատարել Սևանից. սահմանված է 170 մլն խմ՝ տարեկան:

Նշենք, որ նախորդ տարիներին, երբ հանրությունը զարմանում էր, թե ձնածածկույթն ավելի քան բավարար է ջրամբարները լցնելու համար, պատկան կառույցից նշում էին, թե գարնանն անձրևներ չեկան․ ձյունը կա′մ գոլորշիացավ, կա′մ ներծծվեց հողի մեջ:

Պարոն Արսեն Հարությունյանը պարզապես կրկնում է այն, ինչ ընդունված է Ջրպետկոմում, թեև Արսեն Հարությունյանն այս անգամ, ինքնատիպության համար, կարող էր այլ բան հորինել՝ լրացուցիչ ջրառի համար, սակայն երևակայությունը երևի թե չի բավարարել, հակառակ դեպքում՝ չէր կրկնի այն, ինչ վաղուց անցել-գնացել ու մաշվել է:

Պարզապես ակնհայտ է, որ Սևանի քիչ թե շատ բարձրացումը ձեռնտու չէ մեր երկրին և որոշ անձանց, ինչի համար էլ Արսեն Հարությունյանը հրապարակայնորեն ստում է, և որ ամենակարևորը, աչքն էլ չի թարթում:

Ի դեպ, վարչապետ Կարեն Կարապետյանը որոշել էր «գմփացնել» ոռոգման համակարգը, թարգմանենք՝ որոշվել էր ոռոգման ջրով ապահովել ողջ Հայաստանը: Իհարկե, տեսան, որ դա խելքին մոտիկ չէ, ոռոգման ջրի հարցն ավելի լուրջ է, քան պարզապես «գմփացնելը»:

Այս տարիներին ոռոգման ջրի հաշվին զգալի թվով մեծ ու փոքր օղակների պաշտոնյաներ սնվել են և այսօր էլ սնվում են, և այդ զարգացած համակարգը չէր կարող մեկ օրում «գմփալ»: Դա է պատճառը նաև, որ ոռոգման որակը բարելավվելու համար անում են ինչպես միշտ՝ սուտ են խոսում, որ գողանան, կամ գողանում են և սուտ են խոսում:

Այսօր էլ գյուղեր կան, որ ոռոգման ջուր չունեն ընդհանրապես, տարբեր մարզերում գյուղեր կան, որտեղ ջուր են տալիս 20 օրը մեկ անգամ, այն էլ՝ ձևի համար:

Այս տարիներին ոռոգման ջրի համար վեճերը դեռևս նորմալ են դիտվում, քանի որ գործը հասնում է անգամ ձեռնամարտի, ասում են նաև՝ մարդասպանության:

Իսկ ինչո՞ւ համառորեն չեն լցվում ջրամբարները․ ջրամբարների վրա ՀԷԿ-եր են կառուցված և ոռոգման փոխարեն ՀԷԿ-եր են աշխատում, իհարկե, ջրով, և այս պարագայում ջրամբարներում ջուր որտեղի՞ց:

Բացի դրանից, Սևանա լճի մակարդակը բարձրացել է և հերթական անգամ սպառնում է ափամերձ հատվածներում բիզնեսով զբաղվող հայ քաղաքական էլիտայի շահերին, իսկ ի՞նչ պետք է անել, իհարկե, բաց թողնել Սևանի ջուր և այդպես էլ անում են:

Ուղղակի Արսեն Հարությունյանը, ըստ ամենայնի, լինելով խելացի մարդ, պետք է կարողանար անկողմնակալ սուտ հորինել, որը պարզապես չի ստացվել:

NEWSPRESS.am