Հոսպիտալում կային բազմաթիվ կասկածելի երևույթներ․ Վիգեն Սարգսյանը՝ հոսպիտալի պետին աշխատանքից ազատելու մասին

Պաշտպանության նապարար Վիգեն Սարգսյանը մի շարք մտահոգություններ է ունեցել Կենտրոնական զինվորական հոսպիտալի մասով։ Դրանք վերաբերել են  կենցաղային ու սանիտարական որոշ պայմաններ չապահովելու և կարգ ու կանոնի խնդիրներին:

Այս մասին նախարարն ասաց մամուլի ասուլիսի ժամանակ՝ անդրադառնալով հոսպիտալի պետին աշխատանքից ազատելու պատճառներին: Այս խնդիրների ուսումնասիրության արդյուքնում էլ կատարվել է  նոր նշանակումը։ Նախարարը կանգ է առել Սիսիանի հոսպիտալի պետի ընտրության վրա, քանի որ նրա աշխատանքով շատ տպավորված է:

«Կար բուժման արհեստական երկարացման որոշակի միտում, արձակուրդում գտնվող զինծառայողների մասսայաբար հիվանդանալու և բազմաթիվ այլ երևույթների կասկածներ, որոնք պատիվ չէին կարող բերել ռազմաբժշկական ծառայությանը»,- նկատեց Վիգեն Սարգսյանը։

Անդրադառնալով զինվորական մեքենայի վթարի դեպքին՝ Վիգեն Սարգսյանն ասաց, որ մեքենան գերծանրաբեռնված չի եղել, այնտեղ եղել է 20 զինծառայող։ Բացի այդ, այն եղել է ժամկետի մեջ: Տուժած բոլոր զինծառայողների առողջական վիճակը, նրա խոսքով, բավարար է, մեկի վիճակն էր մի փոքր ծանր, բայց կյանքին ոչինչ չի սպառնում:

Լրագրողի դիտարկմանը, թե միգուցե վթարի պատճառն այն է, որ խոշոր չափի մեքենաները վարում են 18-19 տարեկան զինծառայողները, ովքեր փորձ չունեն, Վիգեն Սարգսյանը պատասխանեց. «Ես չեմ կարծում, որ տեխնիկայի չափն ու մարմնի կազմվածքն ուղիղ փոխշաղկապվածության մեջ են: Ձեր տրամաբանությամբ տիեզերական նավերը կամ ինքնաթիռները մենակ պետք է հսկաներ վարեին: Նրանց պրոֆեսիոնալիզմը որոշվում է իրենց ուսուցմամբ, իրենք անցնում են համապատասխան ուսուցման փուլ»:

Նախարարը նշեց նաև, որ բանակը մշտապես համալրվում է նոր ավտոմեքենաներով, այս տարի մեծաքանակ մեքենաներ են գնվել, որոնք հիմնականում ուղարկվում են առաջնագիծ: