Հայկական հարկահավաքության Ապոլլոնը

Ժամանակ առաջ մամուլում տեղեկություններ կային, որ դեռևս «Գազպրոմ Արմենիա» ՓԲԸ գործադիր տնօրեն Վարդան Հարությունյանը «Հաղթանակ» զբոսայգու հարևանությամբ նոր շքեղ առանձնատուն է կառուցում: Ըստ շրջանառվող լուրերի՝ Վարդան Հարությունյանն այս առանձնատունը կառուցում է «Գազպրոմ Արմենիայի» սեփականատեր ռուսական «Գազպրոմ» բաց բաժնետիրական ընկերության վարչության նախագահ Ալեքսեյ Միլլերի համար:

«Ես մինչև 2016 թ. հոկտեմբեր ամիսն աշխատել եմ բիզնեսում: Եթե անհաջողակ բիզնեսմեն լինեի, ոչինչ չէի ունենա»,-հայտարարել է նա:

Ի դեպ, մինչև ՊԵԿ նախագահ նշանակվելն այդ մասին արդեն լուրեր էին պտտվում, սակայն նա այդ լուրերը համառորեն հերքում էր. ենթադրվում էր, որ ՊԵԿ նախագահ աշխատելուց եթե ձախողվի, ապա «Գազպրոմ-Արմենիա» վերադարձ չի լինի, իսկ «Գազպրոմ Արմենիան» նրան մեծահարուստ դառնալու երջանկություն է պարգևել, հրաժարվելն ուղղղակի անմտություն կլիներ, սակայն, ինչպես ցույց տվեց ժամանակը, Վարդան Հարությունյանը դարձավ ՊԵԿ նախագահ:

Շահե՞ց, թե՞ ոչ այս նշանակումից, քննարկման հարց է, սակայն ՊԵԿ շուրջ 500 մեծ ու փոքր պաշտոնյա զրկվեց աշխատանքից: Իհարկե, չի բացառվում, որ այս տարիներին ՊԵԿ-ում հավաքվել էին տարբեր կարգի և մասնագիտության տեր անձինք, սակայն շուրջ 500 հոգու աշխատանքից ազատելը դեռ չի նշանակում, որ հաջորդ 500 հոգին կլինեն ազնվության, արհեստավարժության տիպար:

Հավանականությունը մեծ է, որ նրանք էլ կգնան նախկինների ճանապարհով, սակայն այս անգամ ՊԵԿ-ը կվերածվի «գազի» կցորդիչի, ինչպես դարձավ կառավարությունը, ինչպես դարձան այն օղակներ, որտեղ գազի վարչապետ Կարեն Կարապետյանը նշանակեց գազի կառավարիչների: Ժամանակ առ ժամանակ տեղեկություններ են շրջանառվում նորաթուխ գազային կառավարիչների անձեռնահասության, մտերիմներին աշխատանքի խցկելու և այլ հերոսությունների մասին: Է եթե այդպես պետք է իրենց պահեին, գոնե տարիների փորձ ունեցողներ հաստատ կային ՊԵԿ համակարգում, որոնք էլ շարժիչ ուժն էին հանդիսանում, սակայն կրճատելով նման թվով մարդկանց՝ ՊԵԿ-ը հաստատ շատ բան չշահեց` միայն թափուր տեղեր մերձավորների համար:

Ի դեպ, Վարդան Հարությունյանը ենթադրում է, որ կարողացել է ահռելի հարստություն կուտակել, ապա կարողացել է նաև կատարելության հասնել արտաքին տվյաների գծով, նա նախօրեին լրագրողի` «դո՞ւրս եք գալու ՊԵԿ-ից, թե՞ ոչ» հարցին պատասխանել է՝ ես հեռացող պաշտոնյայի նմա՞ն եմ: Գրեթե Ապոլլոն, կամ գոնե ինքնասիրահարված Նարգիզ: Հետաքրքիր է, ըստ Վարդան Հարությունյանի՝ ի՞նչ տեսք են ունենում աշխատանքից հեռացող պաշտոնյաները:

Հաղորդենք, որ Վարդան Հարությունյանն ունի երկու առանձնատուն, երեք բնակարան և 12 հողամաս: Որպես շարժական գույք՝ նա հայտարարագրել է 1 Range Rover 4.4 L V8, 1 Mercedes-Benz S 500 և 1 UAZ 469 տեսակի ավտոմեքենա: Պաշտոնն ստանձնելու օրվա դրությամբ նա մի ընկերությունում 309 միլիոն դրամ արժողությամբ բաժնետոմս ունի, իսկ ավելի քան 3 միլիոն ԱՄՆ դոլար փոխառություն է տվել: Վարդան Հարությունյանն ունի 8 միլիոն դրամը գերազանցող երկու ժամացույց և մեկ նկար: 2016թ. նա ունեցել է 45 միլիոն դրամ, 110 եվրո և 54 հազար ԱՄՆ դոլար: Վարդան Հարությունյանը «Գազպրոմ Արմենիա»-ն ղեկավարելով, միայն մեկ տարում վաստակել է 123 միլիոն դրամ, իսկ տված փոխառությունների դիմաց ստացել է 121 հազար ԱՄՆ դոլար եկամուտ:

Ի դեպ, նրա կենսագրության մեջ նշված չէ, որ Վարդան Հարությունյանը բիզնեսով է զբաղվել, նա եղել է միայն գազային համակարգում, ինչը ենթադրում է, որ նա հենց այս համակարգում էլ հարստացել է:

Կարող ենք հիշեցնել, որ «Գազպրոմը» մի կառույց է, որ տարիներ շարունակ թալանել է ժողովրդին` կրկնակի թանկ վաճառելով գազը, պարզապես նստած տեղում հարստացել են: Թեև հարստացել են, հիմա էլ սրտները գեղեցկություն է ուզում՝ իսկը Ոսկե ձկնիկի պառավի նման. եթե Վարդան Հարությունյանը միլիոնատեր է, ապա ըստ նրա, նաև Ապոլլոնն է. Ափսոս, որ երբեք հայելուց չի օգտվում:

NEWSPRESS.am