Հասմիկ Գաբրիելյանը Աշոտ Գրիգորյանի պայքարի նվիրական ընկերը մնաց մինչև իր կյանքի վերջին վայրկյանը․ ԵՀՄՖ նախագահի տեղակալ

Եվրոպայի Հայկական Միությունների Ֆորումի նախագահի տեղակալ պարոն Հարություն Առաքելյանի խոսքը՝ նվիրված տաղանդավոր երաժիշտ և փայլուն դաշնակահարուհի Հասմիկ Գաբրիելյանին

Հարգելի ներկայացուցիչներ, աշխարհասփյուռ քույրե~ր և եղբայրնե~ր

Եվրոպայի Հայկական Միությունների Ֆորումի նախագահությունը խոր կսկիծով տեղեկացնում է իր երկարամյա և նվիրյալ անդամի՝ Հասմիկ Գաբրիելյանի անժամանակ մահվան գույժը, որը ցնցել է մեր հոգիները…

2017 թվականի հունիսի 27-ին, երկարատև հիվանդության դեմ պայքարից հետո դադարեց բաբախել մեր սիրելի Հասմիկի սիրտը, որը տասնամյակներ իր բարությամբ և մարդասիրությամբ գերել էր հազարավոր հոգիներ և՛ Հայրենիքում, և՛ Սփյուռքում…

Ծնվելով և մեծանալով աշխարհահռչակ մտավորականի ընտանիքում՝ նա բնակա-նաբար ևս դարձել էր մտավորական երաժշտության ասպարեզում:

Դառնալով վիրտուզ դաշնակահար՝ Հասմիկ Գաբրիելյանը իր փառավոր գործունեության ընթացքում տվել է միմիայն բարեգործական բազմաթիվ համերգներ եվրոպական տարբեր բեմերում, քանի որ այդպիսին էր նա: Նրա առաքելությունը բարություն և դրական էներգիա տարածելն էր իր ողջ գիտակցական կյանքում…

Եվ նույնիսկ իր հիվանդության գոյության պարագայում և կեղեքող ցավերի մեջ նա շարունակաբար իր օգնությունն էր առաջարկում ու մատուցում կարիքավոր մարդկանց…

Երիտասարդ տարիքում Հասմիկ Գաբրիելյանը, իր համեստության, ազնվափայլ և գերազնիվ կեցվացքով հանդերձ, որպես կյանքի ընկեր ընտրեց դոկտոր Աշոտ Գրիգորյանին, միաժամանակ դառնալով նրա պայքարի նվիրական ընկերը մինչ իր կյանքի վերջին վայրկյանը…

1993 թվականին, իր ամուսնու և երկու գեղեցկադեմ հրաշամանուկ աղջիկների հետ, հարկադրաբար լքելով hայրենիքը՝ բնակություն հաստատեց Սլովակիայում, և, որպես նոր միջավայր, այդ երկում նրանց շրջապատող մարդիկ բավականին շուտ զգացին Հասմիկ Գաբրիելյանի նույն բարեկամեցողությունը, առաքինությունն ու ազնվականությունը…

Արդյունքում Սլովակիա տեղափոխված նոր հայկական ընտանիքը, Աշոտ Գրիգորյանի ղեկավարությամբ, միանգամից շրջապատվեց անվանի մտավորականներով, քաղաքական և դիվանագիտական գործիչներով, քանի որ Գրիգորյան ընտանիքին պատկանող տունը կարծես դարձել էր Հայաստանի մի մասնիկ, որտեղ կազմակերպվում էին հայկական երեկոներ՝ հայկական ուտեստների մատուցմամբ…

Իսկ եթե հակիրճ՝ ապա Գրիգորյան ընտանիքի կողմից շուրջօրյա քարոզվում էր բազմադարյա հայկական մշակույթը…

Հասմիկի կատարումները հիպնոզացնում էին ներկաներին, և դա էր պատճառը, որ բազմաթիվ անվանի երաժիշտներ ցանկանում էին հանդես գալ Հասմիկ Գաբրիելյանի հետ, նրա ընկերակցությամբ…

Ավաղ այսօր, որպես մխիթարանք, նրան բախտ վիճակված ճանաչողներին, կարող ենք արձանագրել Հասմիկ Գաբրիելյանի թողած ժառանգությունը՝ սիրո, բարության, մարդասիրության առաքինության բարոյականության ժառանգությունը, որը նա թողեց իր վեհ ու վսեմ ընտանիքին, հարազատներին, բազմազգ ընկերական շրջապատին…

Սիրելի Հասմիկ, թող որ այսուհետ քո հոգին ճախրի լույսի մեջ և արդեն բարձունքից հետևես, տեսնես և ուրախանաս, թե ինչպես է քո ընտանիքը շարունակական դարձնում քո կողմից թողնված ժառանգությունը և կյանքի կոչում քո կիսատ թողնված ծրագրերը…

ԵՀՄՖ նախագահություն
ԵՀՄՖ մամլո քարտուղարություն

Բրատիսլավա, Սլովակիա