Փաշինյանը վախենում է «դեն շպրտվելուց»

««Ելք»-ի «նորաթուխները», ինչպես մի առիթով նրանց որակեց Հանրապետական խմբակցության պատգամավոր Վահրամ Բաղդասարյանը, հավանաբար տեղյակ չեն իրենց ավագների կամ, այսպես ասած, Ազգային ժողովի թոհուբոհով անցած ու թրծված փորձառուների բռնած գործերից՝ չնայած այն բանին, որ հենց այդ «գործերի» շնորհիվ է «Ելք»-ը հայտնվել խորհրդարանում։

Այնպես չէր, որ ԱԺ-ում իր ելույթի ժամանակ պատգամավոր Նիկոլ Փաշինյանը չհասկացավ Վահրամ Բաղդասարյանի նկատողությունը՝ ուղղված նորաթուխներին։ Պարզապես Փաշինյանը ոտքը դրել էր «գազին» ու իր հարայ-հրոցով Բաղդասարյանին «պադեզդ» էր կանչում և նրա «գլխին շիշ խփում»՝ մի պարզ պատճառով, որ այդ նույն նորաթուխներին «շախի գցի», քանի որ ամբողջ «ստավկան» նրանց վրա է։

Մինչև ընտրությունները, «Ելք» դաշինքի օգտին քվեարկելու կոչերով Փաշինյանն ու իր թիմակիցները փորձում էին համոզել հասարակությանը, որ իրենց «պետք չէ կասկածել», որ ««Ելք»- ը ժողովրդի ուժն է», և ի վերջո, որ իրենք «խաղեր չեն տալու»։

Այժմ, մի կողմից ընտրողներին հուսախաբ չանելու, մյուս կողմից էլ իրենց տեղն ու դիրքը խորհրդարանում ամրապնդելու համար, Ելք-ը «խաղեր է տալիս»։

Բայց քանի որ վերջին հայտնի միջադեպի ժամանակ Փաշինյանը չափից մի քիչ ավելի «գազ տվեց» և կարող էր ամեն ինչ փչացնել, ուստի Վահրամ Բաղդասարյանն ու ԱԺ նախագահ Արա Բաբլոյանը նրան փորձեցին սաստել՝ «Նի-կոլ… Նի-կոլ…» վանկարկելով ու մատ թափ տալով։ Ըստ էության՝ դա զգուշացում էր նաև, որ «Ելք»-ը նման տեմպերով երկար չի գնա ու կքանդվի։

Այդ մասին ակնարկեց նաև Վահրամ Բաղդասարյանը՝ «համբերեք մինչև 2018 թվական և կտսնենք»,-ասաց նա։

Իսկ իշխող կուսակցության ներկայացուցչի այս «կանխատեսումը» մտացածին չի կարող լինել։ Այն էլ այնպիսի մի պրոյեկտի դեպքում, ինչպիսին «Նիկոլ Փաշինյան» պրոյեկտն է, որը խորհրդարանական ընտրություններին փայլուն դերակատարում ունեցավ ու արժանացավ «օսկարի»՝ մանդատի տեսքով։

Հիմա երկուսից մեկը՝ կա′մ նա նույն ոգեշնչվածությամբ պետք է շարունակի իր «գրպանային ընդդիմության» դերը՝ նոր ու ավելի հետաքրքիր խաղ նախագծելով, կա′մ «կպայթի»՝ ինչպես իշխանության կողմից բուծած ու գործարքի մեջ մտած որոշ «պրոյեկտներ», որոնք երկար օգտագործվելուց հետո, ի վերջո, դեն շպրտվեցին:

Այլ կերպ ասած, Նիկոլն այլընտրանք չունի. եթե չհաջողի ու իր խաղի համար ծափերի չարժանանա, ապա դեն կշպրտվի:

Արմինե Մկրտումյան