Գիտելիքի զգալի պաշարով ու պայուսակներն ուսերին՝ փոքրիկները պատրաստ են դպրոցին (լուսանկարներ)

Արաբկիրի թիվ 23 մանկապարտեզի ավագ խմբի սաները հրաժեշտ տվեցին իրնեց առաջին կրթօջախին: Հրաժեշտին նվիրված ցերեկույթը կազմակերպվել էր դաստիարակ Լիլյա Մելքոնյանի նախաձեռնությամբ:

Երաժշտության դաստիարակչուհի  Ընկ. Հասմիկի մտահղացմամբ էլ բեմադրվել էր ներկայացում՝ «Անճոռնի ճուտիկը»  հեքիաթի մոտիվով:

Բեմականացման վրա աշխատել էր նաև Պարուսույց Անուշ Ղարիբյանը: Նրա շնոհիվ Անճոռնի ճուտիկի հանդիպումները բակի թռչունների ու կենդանիների հետ, անցան ինքնատիպ՝ համալրված պարային գեղեցիկ համարներով:

Երեխաների սահուն ու վարժ խոսքը, բեմի վրա վստահ կեցվածքն ու անկաշկանդ պահվածքն արդեն վկայում էին այն մասին, որ նրանք լավ են յուրացրել մանկավարժների տված դասերն ու լիովին պատրաստ են դպրոցին:

Ուշագրավ էր նաև այն, որ միջոցառման ողջ ընթացքին հետևում ու այս կամ այն գործողությամբ օգնում էին մանկապարտեզի բոլոր աշխատողները: Իսկ սա արդեն փայլուն վկայությունն էր այն բանի, որ մանկական այս հիմնարկի մանկավարժները ոչ միայն իրենց գործում հմուտ մասնագետներ են ու լավ դաստիարակներ, այլև սրտացավ իրենց գործի նկատմամբ ու պատասխանատու երեխաների հետ առնչվող բոլոր հարցերին: Հենց այդ սրտացավության ու նվիրվածության շնոհիվ էր բեմականացումն անցավ անթերի և հիացմունք պատճառեց բոլոր ներկաներին:

Շնորհավորելով մանկական հիմնարկի սաներին և նրանց ծնողներին ավարտական միջոցառման կապակցությամբ՝ տնօրեն Աստղիկ Հովիկյանը նաև շնորհակալություն հայտնեց իր մանկավարժական կոլեկտիվին՝ հրաշալի միջոցառում կազամկերպելու և այն գեղեցիկ մատուցելու համար:

Նա իր խոսքում նկատեց, որ փոքրիկներն այս կրթօջախում ստացել են գիտելիքի զգալի պաշար, որի համար պետք է պատասխանատվություն կրեն արդեն ծնողներն ու նրանց դպրոցի ուսուցիչները, ովքեր կպահպանեն և կավելացնել այդ գիտելիքները:

Ծնողները ևս իրենց երախտիքի խոսքն ունեին ասելու մանկավարժներին, ովքեր մի քանի տարի իրենց թևի տակ, մայրական ջերմ գուրգուրանքով պահել, կրթել ու դաստիարակել էին իրենց երեխաներին:

Մանկապարտեզի սաները, Երևանի քաղաքապետարանի կողմից ստացան նվերներ. դպրոցական պայուսակներ՝ գրենական պիտույքներով:

Եղան նաև լուսանկարներ: Բոլորը ցանկանում եին վերջին անգամ, մանկապարտեզի հարկի ներքո, նկարվել սիրելի դաստիարակի հետ։ Լիլյա Մելքոնյանն իր սաներին նվիրեց նկարների հուշագրքույկ, որը դեռ երկար ժամանակ կիշեցնի երեխաներին մանկապարտեզում անցակցրած երջանիկ, գեղեցիկ ու հագեցած օրերի մասին։

Այնպես որ գիտելիքի զգալի պաշարով ու պայուսակներն իրենց ուսերին՝ փոքրիկներն արդեն պատրաստ են դպրոցին:

Արմինե Մկրտումյան