Երիտասարդ դատավոր Հայարփի Զարգարյանը շրջանցե՞լ է օրենքը

Նախկին պատգամավոր Արսեն Ավագյանը և Լուսինե Ավագյանն ամուսնալուծվել են 2016 թվականին․ գույքային վեճերից բացի, ամուսինները փորձում են կարգավորել նաև 8-ամյա երեխայի խնամքի և բնակության հարցերը։ Այս մասին NEWSPRESS.am-ին հայտնեց ինքը՝ Արսեն Ավագյանը՝ «Տուգոն»։

Նշենք, որ և Արսեն Ավագյանը և Լուսինե Ավագյանն առանձին հայցադիմումներ էին ներկայացրել՝ երեխայի բնակության վայրը սահմանելու վերաբերյալ։ Հայցադիմումները ներկայացվել են Կենտրոն և Նորք Մարաշ առաջին ատյանի դատարան՝ տարբեր դատավորների մոտ։ Լուսինե Ավագյանի հայցը քննվում է դատավոր Հայարփի Զարգարյանի, իսկ Արսեն Ավագյանի հայցադիմումը՝ դատավոր Էդիկ Ավետիսյանի մոտ։

Արսեն Ավագյանը մեզ հայտնեց, որ գույքի և երեխայի խնամքի միջև կապ կա․ «Այն հասցեն, որ Լուսինե Ավագյանը խնդրել է սահմանել որպես երեխայի բնակության հասցե, տրված է վարձակալությամբ և իմ ու նախկին կնոջս միջև հանդիսանում է գույքային վեճի առարկա։ Ես դիմել եմ այլ հայցադիմումով դատարան՝ ամուսնության ընթացքում ձեռքբերած գույքը բաժանելու պահանջով»։

Ըստ Ավագյանի՝ նախկին կինն իրավունք չունի բնակվելու նշված հասցեում և երեխայի համար ևս չի կարող պահանջել այդ հասցեն սահմանել որպես բնակության վայր, քանի դեռ գույքը չի բաժանվել։

«Երեխաս գրանցված է Ձորաղբյուրում՝ մորս պատկանող տանը, որտեղ մինչև ամուսնալուծությունը բնակվում էր իմ ընտանիքը»,- ասում է Ա․ Ավագյանը՝ հավելելով, որ երեխայի բնակության վայրի հետ կապված գործընթացի շրջանակներում արգելվում է Արսեն Ավագյանին երեխայի հետ մեկնել արտերկիր, սակայն մի օր պատահաբար հանդիպելով փողոցում՝ երեխան փաթաթվում է հորը, և հայրը նրան տուն է տանում։

Այս ընթացքում երեխան հեռախոսով շփվում է մոր հետ, սակայն հեռախոսազանգերը լինում են գիշերը ժամը 24-ից հետո, երբ երեխան արդեն քնած էր, և սկսած այս տարվա հունիսի 3-ից, երեխան բնակվում է հոր մոտ։

«Այս ընթացքում Լուսինե Ավագյանը միջնորդություն է ներկայացնում տեսակցության կարգ սահմանելու վերաբերյալ՝ մինչև դատական գործի ավարտը։ Տեսակցության կարգ է սահմանվում՝ երկուշաբթի՝ առավոտյան ժամը 10-ից, մինչև հինգշաբթի ժամը 22-ը։ Երեխան գիշերակացով պետք է մնա Լուսինե Ավագյանի մոտ, սակայն չի նշվում, որ եթե չվերադարձնի երեխային՝ ինչ է սահմանվում։ Կարճ ասած՝ դատավոր Հայարփի Զարգարյանը բավարարում է միջնորդությունը»,- ասում է Ա․ Ավագյանը՝ հավելելով, որ ըստ այդ որոշման՝ դատավորը դուրս է եկել հայցի շրջանակներից, քանի որ հայց է ներկայացված բնակության վայրը որոշելու վերաբերյալ, սակայն որոշում է կայացվել սահմանել տեսակցության կարգ, որոնք տարբեր բաներ են։

«Ես կարող եմ հավելել, որ այդ բնակարանը, որ նախկին կինս նշում է՝ որպես երեխայի բնակության վայր, տրված է վարձով և որտե՞ղ պետք է երեխան բնակվի՝ վարձակալությամբ տրված տա՞նը»,- հարցնում է հայրը։