Ի՞նչ է կատարվում ՍԱՊԾ-ում

Նարեկ Մանթաշյանն աշխատանքից ազատվել է իր դիմումի համաձայն, այս մասին փոխանցում են ՍԱՊԾ-ից:

Հիշեցնենք, որ Նարեկ Մանթաշյանը ՍԱՊԾ-ում իր իրավունքների խախտման և ապօրինի կերպով աշխատանքից ազատվելու համար դիմել էր վարչապետին:

Իհարկե նշելով, որ Նարեկ Մանթաշյանն իր դիմումի համաձայն է դուրս եկել աշխատանքից՝ ՍԱՊԾ-ում պարզապես պաշտպանվում են, քանի որ եթե Նարեկը Մանթաշյանն իր կամքով դուրս գար աշխատանքից, չէր դիմի վարչապետին՝ իր խախտված իրավունքները վերականգնելու համար:

Ի դեպ, սովորաբար, բաց նամակ գրում են վարչապետին այն անձինք, ովքեր չեն կարողանում պայքարել համակարգի դեմ և իրավունքների վերականգնման համար այլ ճանապարհ չեն գտնում:

Նշենք նաև, որ ՍԱՊԾ-ում աշխատանքից աղմկահարույց կերպով ազատվելու թեման նոր չէ, քանի որ արդեն նման դեպքեր եղել են և այն էլ հրապարակային:

ՍԱՊԾ-ն՝ որպես սովորական պետական կառույց, սովորաբար հիշեցնում է ծանոթ-բարեկամների կամ պաշտոնյաների ազգականների համադաշնակցություն, որտեղ քաղծառայող լինելը դեռ քիչ է, պետք է ունենալ համապատասխան կապեր:

Արդյունքում այն վիճակն է, որ կա տեսանելի աչքի համար:

Կաշառք կոչվածը դժվար բացահայտելի երևույթ է, սակայն ՍԱՊԾ-ն այստեղ ևս անմասն չէ, և ժամանակ առ ժամանակ լրատվամիջոցներում են հայտնվում կաշառքի վերաբերյալ երևույթների մասին տեղեկություններ. որոշ դեպքերում այդ մարդիկ հանդիսանում են այս կամ այն բարձրաստիճան պաշտոնյայի ազգականը:

Ի դեպ, մամուլում տեղեկություն կար, որ ՍԱՊԾ պետ Իշխան Կարապետյանը հանձնարարել է մի քանի աշխատակցից ևս վերցնել աշխատանքից ազատման դիմումներ՝ առանց ազատման օրը նշելու:

Պարզվում է, որ ՍԱՊԾ-ում իրենց հիմնական գործը թողած՝ զբաղված են աշխատակիցներ ազատել-ընդունելով, աճպարարություններով, սակայն ոչ հիմնական գործով, և այդ է պատճառը, որ թուրքական լոլիկներ, ադրբեջանական կոնֆետներ և այլ կարգի կասկածելի սնունդ է հայտնվում հայրենի շուկայում:

Այնպես, ինչպես Իշխան Կարապետյանին վարչապետը բերեց-տեղավորեց աշխատանքի, այնպես էլ նա է ՍԱՊԾ բերում տեղավորում իրեն հաճո անձանց, իսկ այն անձինք, ովքեր քննություններ են հանձնել և կարող են ոլորտում աշխատել՝ դուռն են ցույց տալիս:

Ցավալի է այն, որ այսկերպը պետական համակարգում գործելաոճ է. թողնում են իրենց հիմնական գործը, զբաղվում աշխատակիցներին ազատել-ընդունելով, ծանոթ-բարեկամներին գոհացնելով, շեֆի հրամանները կատարելով:

Արդյունքում ուռճացած պետական համակարգն է՝ իր կասկածելի աշխատակիցների բանակով, իսկ այդ դեպքում ովքե՞ր են կատարում գերատեսչական աշխատանքը. մոտավորապես՝ 4-ից 1-ը, իսկ 3 հոգին կա′մ ազգական են, կա′մ սիրուհի, կա′մ տեղավորել են աշխատանքի:

ՍԱՊԾ-ն բացառություն չէ:

NEWSPRESS.am