«Հրապարակ». Եվս 2 պոլիկլինիկա կփակվի

«2017-20 թվականներին վաճառքի հանված պետական մասնակցություն ունեցող առողջապահական 10-ից ավելի հաստատությունների թվում են «Երևանի երկաթուղու պոլիկլինիկա» և «Վարդենիսի ստոմատոլոգիական պոլիկլինիկա» ՓԲ ընկերությունները:

Երևանի երկաթուղու պոլիկլինիկան գտնվում է Երևանի Արցախի փողոց 8բ հասցեում, ստեղծվել է տրանսպորտի նախարարության 1998թ. հունիսի 29-ի որոշմամբ՝ «ՀՀ երկաթուղի» ՊՓԲԸ-ի

«Երևանի երկաթուղու պոլիկլինիկա» դուստր ձեռնարկության վերակազմավորման ճանապարհով: Ընկերության կանոնադրական կապիտալը 10 միլիոն 500 հազար դրամ է, որը կազմում է 210 սովորական անվանական բաժնետոմս: Իրականացնում է տրանսպորտի համակարգի աշխատողների բժշկական հետազոտում, ատամնաբուժական գործունեություն, կենցաղային սպասարկում, երկաթուղայինների բժշկական զննություններ, բժշկական փորձաքննություն և առողջական վիճակի գնահատում, ինչը կարևոր է ուղևորափոխադրման անվտանգության ապահովման տեսանկյունից: Կազմակերպությունը ֆինանսավորում է «Հարավկովկասյան երկաթուղի» ՓԲԸ-ն:

Պետությունը հատկացնում է կես միլիոն դրամից էլ պակաս պետպատվերի գումար: Պոլիկլինիկայի տնօրեն Միսակ Նահապետյանը մամուլին ասել էր, որ մեկ տարի առաջ տեղյակ է եղել հնարավոր մասնավորեցման մասին, սակայն իր կարծիքը հաշվի չեն առել: Տնօրենն ինքն էր առաջարկել միավորել իրենց պոլիկլինիկան Ուսանողական պոլիկլինիկայի հետ։ Չստացվեց: Մյուս առողջապահական հաստատությունը վաճառքի է ներկայացրել Գեղարքունիքի մարզպետարանը:

Խոսքը «Վարդենիսի ստոմատոլոգիական պոլիկլինիկա» ՓԲԸ-ի մասին է, որ գտնվում է Վարդենիս քաղաքի Երիտասարդության 15 հասցեում: Այս ընկերությունից կառավարությունը փորձում է ազատվել արդեն երկար ժամանակ: Կառավարության 2009թ. հոկտեմբերի 23-ի նիստում պետական գույքի մասնավորեցման 2006-2007թթ. ծրագրերում փոփոխություններ կատարվեցին՝ դրանում ներառելով «Վարդենիսի ստոմատոլոգիական պոլիկլինիկա» ՊՓԲԸ-ն: Այդ դեպքում հարցեր են ծագում՝ որպես ի՞նչ են վաճառվում այս կենտրոնները: Եթե պայման չի դրվելու պրոֆիլի պահպանումը, ապա հաստատության շենքը կառավարությունը կարող է օգտագործել գուցե ա՞յլ բանի համար»,-գրում է թերթը:

Մանրամասները՝ թերթի այսօրվա համարում: