Վարչապետը որոշել է կերակրել վիշապին

«Մենք բարձրացրել ենք տրամադրվող գյուղատնտեսական վարկերի շեմը՝ սահմանելով 3-10 մլն դրամ, որոնց տոկոսադրույքները սոցիալական աջակցություն ստացող սահմանամերձ համայնքների շահառուների համար կազմում են 3 տոկոս, իսկ մյուս տարածաշրջանների ներկայացուցիչների համար՝ 5 տոկոս: Մթերման համար յուրաքանչյուր մթերողին տրամադրում ենք մինչև 150 մլն դրամի դրամային վարկ՝ 3 տոկոս տոկոսադրույքով: Վերամշակող ձեռնարկությունների համար գազի գինը նվազեցվել է 40 տոկոսով: Ես շատ այլ կառավարություններ չգիտեմ, որոնք այսքան թե՛ ֆինանսական, թե՛ այլ տեսակի աջակցություն են ցույց տալիս գյուղոլորտին»:

Այս մասին ասել է վարչապետ Կարեն Կարապետյանը կառավարությունում տեղի ունեցած խորհրդակցության ժամանակ, որին մասնակցում էին կոնյակի և գինու արտադրությամբ զբաղվող ընկերությունների ներկայացուցիչները:

Իհարկե, լավ է, որ վերամշակող ընկերություններին լրացուցիչ հնարավորություններ են տրվում հողօգտագործողներին վճարելու համար, սակայն արդյոք դա օգնությո՞ւն է գյուղոլորտին, ինչպես ասում է վարչապետը:

Նախ վստահաբար կարող ենք ասել, որ նախորդ տարիներին վերամշակողները չէին վճարում բերքի դիմաց, քանի որ սովորել են «քցել» գյուղացուն: Եթե գործարանները հնարավորություններ չունեն, դրանք պարզապես չեն աշխատի, ոչ թե յուրաքանչյուր վերամշակող գործարանի սեփականատեր կհպարտանա բանկային սեփական միլիոններով:

Կառավարության այս ձևը պարզապես հնարավորություն է, որ գյուղացիներին վերամշակողները չխաբեն, և սա շատ խղճալի օգնություն է գյուղացուն, քանի որ խոշորին կերակրում են, որ մանրին կուլ չտա:

Իսկ ինչ վերաբերում է, թե ով է այսքան գործ անում գյուղոլորտի համար, նշենք, որ հենց գյուղոլորտի ներկայացուցիչներին պետք է հարցնել, թե ինչ է պետք անել, ոչ թե ամենաբարձր ամբիոնից խոսել նրանց փոխարեն և նրանց կարիքները ներկայացնել ծուռ հայելու մեջ:

Նախ հողօգտագործողները կներկայացնեն ոռոգման ջրի հարցը, որը, ինչպես արձանագրեցինք տարվա կտրվածքով, լուրջ խնդիր էր և է:

Նախ համայնքներ կան, որ օրերով, շաբաթներով ջուր չեն տալիս, գյուղեր կան, որոնք ենթարկվում են քաղաքական վայրիվերումների և հետևաբար ջուր չեն ստանում:

Ասում են՝ Արտաշատ և Վեդի ՋՕԸ պետ Արթուր Ղազարյանն իր ենթակայության տակ եղած համայնքներին ոռոգման ջուր է մատակարարում կամայականորեն: Աղբյուրների փոխանցմամբ՝ Գազի Հովոյի որդին այսօր վրեժ է լուծում այն համայնքներից, որոնք խորհրդարանական ընտրությունների ժամանակ ձայն են տվել «Ծառուկյան դաշինքին»: Այդ համայնքները ամիսներով ոռոգման ջրի երես չեն տեսնում: Ոռոգման ջրի մատակարարման, և գնի հարցը ևս օրակարգային են և դեռևս անլուծելի:

Ոռոգման ջրի կարգավորումը հնարավորություն կտա ոլորտում աճ արձանագրել, քանի որ շատ հողատարածքներ չեն մշակվում հենց ոռոգման ջրի բացակայության հետևանքով: Իսկ վիշապին կերակրել, որ հողօգտագործող-արտադրողներին կուլ չտա, հաստատ գյուղոլորտի խնդիրներից առաջինը չէ, ինչպես հպարտանում էր վարչապետը, այլ վերջինը:

NEWSPRESS.am