Հաց արտադրողները դեմ են մաքրությանը

ՀՀ ԳՆ սննդամթերքի անվտանգության պետական ծառայությունը որոշել է, որ սեպտեմբերի 1-ից հաց և միս տեղափոխող փոխադրամիջոցների համար սանիտարական անձնագրի առակայությունը պարտադիր է լինելու:

Իհարկե, նման կարգ պետք է վաղուց գործեր, սակայն, ինչպես ասում են` լավ է ուշ, քան երբեք:

Այժմ էլ պարզվում է, որ տնտեսվարողները դժգոհ են. մինչ այս միսը և հացն իրացման կետեր են հասցվել ինչպես պատահի, որտեղ պատահի: Քաղաքացիները վկա են եղել սանիտարահիգիենիկ պայմանների բացակայությամբ թե′ հացի, թե′ մսի տեղափոխման: Տեղափոխել են մեքենաների բեռնախցիկով, որտեղ տեղավորում են ինչ պատահի, բացի սննդամթերքից: Տեղափոխել են և այժմ էլ շարունակում են տեղափոխել բեռնատար «Ֆորդ» մակնիշի մեքենաներով և նույն հակասանիտարական պայմաններում:

Ինչ վերաբերում է տնտեսվարողների դժգոհություններին, ապա նշենք, որ այս տարիներին, հատկապես հացամթերքի արտադրությամբ զբաղվող տնտեսվարողներն օրական մինչև 14 ժամ աշխատեցնում են բանվորներին, հացթուխներին, վճարում գրոշներ, իսկ հացի արտադրության տարածքի ուսումնասիրությունները բոլորովին մխիթարական չեն: Բավական չէ, որ քաղաքացիները տարիներով հանդուրժել են նման հակասանիտարական իրավիճակը, այժմ էլ տնտեսվարողները մտածում են, որ իրենց գերշահույթներից փոքր-ինչ կպակասի, որ օրինական և մաքուր պայմաններով սննդամթերք մատակարարեն:

Նման մտածելակերպ ունեցող տնտեսվարողները ոչ թե պետք է հաց արտադրեն, ինչը Հայաստանում թիվ մեկ սննդամթերքն, այլ ընտրեն մեկ այլ արտադրություն, որի արդյունքում քաղաքացիների առողջությունը չի տուժի:

Իհարկե, կյանքը ցույց է տալիս, որ նման մտածելակերպ ունեցող տնտեսվարողների համար հացի կամ անվադողերի արտադրությունը միևնույնն է, կարևորը գերշահույթ ստանալն է:

Նման դժգոհությունները նաև արդեն ազդակ են, որ տնտեսվարողները սովորել են «պադվալներում» հաց արտադրելուն, սովորել են կեղտոտ մեքենաներով հաց առաքելուն և այսօր դժգոհում են, որ մաքրության և սանիտարիայի պայմաններում պետք է աշխատեն:

Հացը փող է բերում, իսկ մաքրությունն արտադրողներին որևէ օգուտ չի տալիս: Բացի այդ, հաց տեղափոխող մեքենաներում հացն ընկնում է մեքենայի հատակին, ձեռքով տեղավորում են, ձեռքեր, որոնք երևի իրենց հակահիգիենիկ վիճակով կարող են մրցել մեքենայի սրահի հետ:

Հիգիենիկ պայմաններով հաց առաքելուն դեմ տնտեսվարողներին ուղղակի պետք է արգելել զբաղվել նման արտադրությամբ, ոչ թե հանրության առողջությունը վտանգեն` գրպանները լցնելու համար:

NEWSPRESS.am