«Հյուսիս-Հարավ» ավտոճանապարհի միլիոնների գողը Ֆանտոմասն է

«Հյուսիս-Հարավ» ավտոճանապարհի կառուցման վրա ծախսվել է շուրջ 150.3 մլն ԱՄՆ դոլար և 23,14 մլն եվրո գումար, կառուցվել է 31 կմ ճանապարհ: Մեկ կմ-ը արժեցել է մոտ 6 մլն դոլար:

Այս տարիներին «Հյուսիս-Հարավ» ճանապարհի շինաշխատանքների ժամանակ Վերահսկիչ պալատը բացահայտել էր ծավալային հավելագրումներ, անորակ աշխատանքներ, արհեստականորեն ուռճացված գներ:

Հետո պարզվեց, որ կապալառուներն էին վատ աշխատել, գումարներ էին անհետացել, և զարմանալի չէ, որ 1 կմ ճանապարհն արժեցել է մոտ 6 մլն դոլար:

Ի դեպ, հիշեցնենք, որ ճանապարհի շինարարությունն սկսվեց 3 տարի ուշացումով` 2012թ-ին, ինչի համար ՀՀ պետբյուջեից որպես տուգանք վճարվեց 300 հազար դոլար. սա՝ ի միջի այլոց: Իսկ թե ինչու ուշացավ շինաշխատանքների մեկնարկը, այդպես էլ չպարզաբանվեց:

Վերջին շրջանում էլ ակտիվացել են «Հյուսիս-Հարավ» ճանապարհի շուրջ խոսակցությունները:

Կարող ենք հավելել, որ նման իրավիճակները նախ պատահական չեն առաջանում. այն ձեռնտու է շինաշխատանքների հետևում գործող անձանց, մարդկանց պատահաբար չեն հեռացնում գործից, քանի որ դա էլ պատահական չի լինում, իսկ թե ինչո՞ւ որևէ անձ կամ անհատ պատասխան չի տալիս, այ այստեղ է ամենահետաքրքիր հատվածը: Որովհետև այն անձը կամ անձինք, ովքեր կանգնած են շուրջ 1 մլրդ դոլար արժողության ճանապարհի հետևում` անհասանելի են հայկական իրավապահ համակարգից, հակառակ դեպքում՝ գումար մսխողները, չարաշահողները, վստահություն չներշնչող կապալառուները, հայկական մոտիվացիաներով աշխատող արտասահմանյան կազմակերպություններն այս կամ այն կերպ պատասխան կտային:

Ի դեպ, հայկական մոտիվացիայով գործելաոճը ստիպում է մտածել նաև, որ այս մայրուղու շինարարության հետևում հայերն են, ոչ թե իսպանացիներ, ֆրանսիացիներ կամ չինացիներ:

Սովորաբար, նման դեպքերում, երբ չարաշահումներ կան, միշտ էլ որևէ անձի անուն շրջանառվում է, սակայն այս դեպքում` քար լռություն, ինչը ևս գալիս է հաստատելու, որ ոմանց համար օրենքը չի գործում:

Իհարկե, ժամանակ առաջ փորձում էին կուժն ու կուլան կոտրել Տրանսպորտի և կապի նախարարության գլխին, սակայն ակնհայտ էր, որ այս նախարարությունն այդքան երկար ձեռքեր չուներ, որ «Հյուսիս-Հարավի» բյուջեից միլիոններ գողանար և ջրից չոր դուրս գար, պարզապես փորձ էր արվում չարաշահումների համար հարմար քավության նոխազ գտնել, սակայն չկարողացան, ոչ թե չէին ցանկանում, այլ` չկարողացան, իսկ այժմ էլ որևէ նոխազ ման չեն գալիս. կույր ու խուլ են ձևանում:

Հայաստանում դեպք կար, երբ հաց էին գողացել և սոված գողին մի քանի տարով ազատազրկել էին, այս դեպքում միլիոններ են գողացել, երկիրը պարտքերի տակ կքում է, մարդկանց համար տրանսպորտային խնդիրներ են առաջացել, սակայն ոչ ոք պատասխան չի տալիս…

Իրոք որ, Հայաստանն ունիկալ երկիր է, անգամ գողությունն ու կողոպուտն է ունիկալ. գողոնը կա` չեն գտնում, գողն էլ` ընդհանրապես Ֆանտոմասն է:

NEWSPRESS.am