Խաղող արտադրողին` մինը, գինի թորողին` հազար ու մինը

2017 թվականի հունվար-հուլիսին Հայաստանում արտադրվել է 4 398.5 հազար լիտր գինի, ինչը նախորդ տարվա նույն ժամանակահատվածի համեմատ ավելի է 32.7 տոկոսով: Եթե նայենք շամպայն-գինիների արտադրությանը, ապա այստեղ ծավալներն ավելացել են 26.2%-ով` կազմելով 274.8 հազար լիտր: Արտադրվել է 12 730.0 հազար լիտր գարեջուր` 2016թ-ի հունվար-հուլիսի համեմատ աճելով 12.5 %-ով:

2017թ. հունվար-հուլիսին արտադրվել է 2 994.5 հազար լիտր օղի և օղու լիկյոր, ինչը 2016-ի նույն ժամանակահատվածի համեմատ նվազել է 37.2%-ով, 2017-ի նույն ժամանակահատվածում՝ 822.6 հազար լիտր վիսկի:

Ընդհանուր առմամբ, ալկոհոլի արտադրության տեմպերը բարձր են, հատկապես այս հանգամանքն արտառոց է, քանի որ վերջին երկու տարում ալկոհոլային հիմնական խմիչքների հումք հանդիսացող խաղողի մթերումը խնդիր է խաղողագործների համար:

Նշենք, որ հենց խաղողագործներին և ընդհանրապես գյուղոլորտին գյուղատնտեսական վարկեր են տրամադրվում 10 տոկոսով, իսկ մինչ այդ 24 տոկոս էր, թեև միջազգային կառույցները չնչին տոկոսներով վարկեր էին տրամադրում Հայաստանին` գյուղոլորտին հնարավորինս օգնելու համար, սակայն չնչին տոկոսներն առևտրային բանկերը հատկացնում էին աստղաբաշխական 24 տոկոս տոկոսադրույքով, և նման իրավիճակը նաև գյուղատնտեսությունը հասցրեց քայքայման:

Ներկայացնել երաշխավորագիր՝ 3 հոգու կողմից, գրավ և չլինել «սև ցուցակում». և  եթե կարողանում են այդ փաթեթը հավաքել, պարզվում է, որ գումարը վերջացել է:

Ի դեպ, վերջերս վարչապետ Կարեն Կարապետյանը հայտնեց, որ գինի և կոնյակ արտադրողներին 3 տոկոս տոկոսադրույքով վարկեր են տրամադրվելու:

Գյուղմթերք արտադրողին՝ 10 տոկոս, իսկ գյուղմթերք վերամշակողին՝ 3 տոկոս: 

Եվ սա՞ է գյուղացուն օգնելու կառավարության գաղափարը:

Թեև նախորդ տարիներին կոնյակ և գինի վերամշակողները փող չունեին, որ խաղողարտադրողներին վճարեին, սակայն կարողացել են արտադրանք տալ, և սա չի՞ խոսում, որ պարզապես խաղողի մթերման գինն էին ցանկանում նվազեցնել, նաև գյուղացուն խաբել, իսկ անունը դնել` փող չունենք գյուղացուն վճարելու համար:

Հանրությանը հայտնի են գինի և կոնյակ արտադրողների անունները, նաև՝ մականունները, ովքեր կազմում են հանրապետության մեծահարուստների լուսապսակը, և եթե նրանք լացում են, թե փող չունենք՝ խաղողի դիմաց վճարելու, ապա ո՞վ փող ունի. վարկերի ծանրության տակ կքած գյուղացի՞ն, ով չի կարողանում պարարտանյութ գնել, որ դաշտը պարարտացնի, ով չի կարողանում երեխաներին դպրոց ուղարկել, քանի որ խաղողի փողը չեն տալիս, տալուց էլ վրայից «քերում» են:

Եվ մի՞թե կարելի է այսպես անպատկառ խաբել:

Կարճ ասած՝ կառավարությունը «խեղճուկրակ» մեծահարուստներին օգնում է` 3 տոկոսով, իսկ «աղա» խաղողարտադրողներին «օգնում» է 10 տոկոսով:

Խաղողարտադրողները չեն կարողանում իրենց տարվա աշխատանքի արդյունքը ստանալ, իսկ խաղող վերամշակողները, ըստ Ազգային վիճակագրական ծառայության տվյալների, այս տարի հազարավոր լիտրերով գինի, օղի, շամպայն, կոնյակ, վիսկի են արտադրել:

Ա′յ, այդքան խեղճ են:

NEWSPRESS.am