Կառավարությունը վճարելու է գողերի փոխարեն, անունը դնելու են` օգնություն գյուղոլորտին

Կառավարության այսօրվա նիստի ժամանակ վարչապետ Կարեն Կարապետյանն անդրադարձել է գյուղացիներին արտոնյալ պայմաններով տրամադրվող պարարտանյութերի և սերմերի դիմաց պարտքերի հավաքագրմանը, դժգոհել է, որ պարարտանոյթւերի և սերմի պարտքը մինչև այժմ հավաքագրված չէ: Նա նաև հիշեցրել է, որ մայիսին էր հանձնարարել ներկայացնել այն անձանց ցանկը, ովքեր պարտքեր ունեն:

Ներկայացնենք, թե այս տարիներին ինչպես է իրականացվել պարարտանյութերի և սերմերի բաշխումը. նախ յուրաքանչյուրը, ում անհրաժեշտ է եղել պարարտանյութ կամ սերմեր, գրանցվել է գյուղապետարանում, վճարել, որից հետո ստացել է իր հասանելիքը: Իսկ թե ինչպես է նման պարտք ձևավորվել, դեռևս անհասկանալի է կառավարության համար: Պարզաբանենք, որ մարդիկ անգամ վճարել էին այն գաճաճ ցորենի սերմացու դիմաց, որի բերքն այդպես էլ չստացան, և ցորենը դաշտերում մնաց, քանի որ կարճահասակության պատճառով հնարավոր չէր այդ ցորենը քաղել:

Պարզվում է, որ մարզպետարանների, գյուղապետարանների ներկայացված ցանկերում խառնաշփոթ է, և շունը տիրոջը չի ճանաչում: Եթե հաշվի առնենք, որ այս կառույցներում, սովորաբար, խնամի-ծանոթ-բարեկամ համակարգն է աշխատում՝ կարելի է պատկերացնել, որ այդ շառավղով դժվար թե գիտնականներ, վիճակագիրներ, գյուղատնտեսներ, մաթեմատիկոսներ լույս աշխարհ գային. կա այն, ինչ կա:

Մարզպետարաններում և գյուղապետարաններում այնպիսի կադրեր կան, որ անգամ տարրական հաշվարկ չեն կարողանում անել, անգամ որևէ տեղեկանք չեն կարողանում լրացնել, էլ ո՞ւր մնաց՝ հաշվեն, թե գյուղի որ բնակիչը քանի պարկ պարարտանյութ է տարել և վճարել: Բայց որ վճարել են, հետո պարարտանյութ և սերմ ստացել, աներկբա է: Մնացածը, ինչպես ասում են, համակարգային կորուստներ են: Մարդիկ կամց-կամաց ծախսել են հավաքագրված գումարը, անունը դրել՝ պարտք, որը գյուղացիները չեն վճարել, իսկ թե հիմա ո՞վ է վճարելու, այլ հարց է:

Ի դեպ, այստեղ Գյուղատնտեսության և Տարածքային կառավարման նախարարությունները ևս չեն կարողանում միմյանց հասկանալ:

Իհարկե, նիստի ժամանակ խոսք եղավ պարտքերի զիջման մասին: Նկատենք, որ դա բոլորովին էլ գյուղացիների պարտք չի լինի, այլ միջանկյալ «սննդառուների», ովքեր օգտվել են գյուղապետարանի, մարզպետարանի բյուջեից: Այն է՝ գողության փոխարեն վճարելու է կառավարությունը, սակայն ներկայացվելու է գյուղացիների պարտքը զիջել և դե մի բան էլ` օգնություն գյուղոլորտին:

NEWSPRESS.am