Իշխանության մեջ «գիտնականների» թիվը կկրճատվի

ՀՀ Պաշտպանության նախարարությունն օրենքի նախագիծ է ներկայացրել, ըստ որի, ուսումը շարունակելու համար տարկետում կստանան միայն այն քաղաքացիները, ովքեր, սովորելով ՀՀ բուհերում, պայմանագիր կկնքեն ՀՀ ՊՆ-ի հետ և ուսման ընթացքում ռազմական պատրաստություն կանցնեն, այնուհետև՝ ուսման ավարտից հետո, կծառայեն ՊՆ-ի կողմից նշված վայրում, նշված պայմաններով:

Քաղաքացուն տարկետում կտրվի մինչև ուսման ավարտի օրը, սակայն ոչ ավել, քան նրա 26 տարին լրանալը:

Տարիներ առաջ տղաները բանակ էին գնում բուհն ավարտելուց հետո միայն, այնուհետև որոշվեց, որ անվճար համակարգում սովորող ուսանողները կարող են ավարտելուց հետո հայրենիքի նկատմամբ իրենց պարտքը կատարել, իսկ ասպիրանտուրան  արդեն անձեռնմխելի էր. գիտնականները բանակին պետք չէին: Այդպես մինչև 27 տարեկան:

Այժմ ՊՆ-ն որոշել է անվճար հիմունքներով սովորողներին ևս ներառել բանակ մեկնողների շարքերում, քանի որ անվճար համակարգում, ինչպես դիտարկումն է ցույց տալիս, սովորում էին այնպիսի ուսանողներ, որոնց գրագիտության աստիճանը միայն խղճմտանք էր հարուցում, այն է` հիմնական մասն ընդունվում էին փողով: Ոմանք, ըստ հավաստի աղբյուրների, ծաղիկներ, աստղիկներ են նկարել ընդունելության քննաթերթիկների վրա, մինչև նրանց է մատուցվել 20 բալին համարժեք քննաթերթիկ` լրացված: Կամ լավ ու բարի ծանոթները մեկ զանգի միջոցով են երիտասարդ, «չաղ ու բախտավորներին»  ընդունել տվել բուհեր:

Ասենք՝ սա կոռուպցիա՞ Է, իհարկե` ոչ, սա Հայաստանում վերջին տարիներին գործող կենսունակ համակարգ է, ի՞նչ կոռուպցիա:

Իհարկե, այս ամենի մասին ՊՆ-ում էլ են տեղյակ և փորձում են «շուստրիներին»  ևս ներառել պարտադիր ժամկետային ծառայության մեջ և կանխել նման «վայ-գիտնականների» «բազմացումը»: Չէ՞ որ, բուհից հետո նրանց սրտներն ասպիրանտուրա է ուզում, իսկ նրանք, ովքեր կոչված էին գիտության մեջ խորանալու և դրա համար ասպիրանտուրայի անվճար տեղերը հնարավորություն էր, նման ծնյալ-գիտնականների երեսից տարբեր ճանապարհներով էին գիտական թեզ պաշտպանում:

Այժմ, եթե ուսումնասիրենք Հայաստանի արտոնյալ խավի կենսագրությունը, ապա ակնհայտ կլինի, որ ՀՀ իշխանությունը գիտնականների, գիտությունների թեկնածուների, դոցենտների, դոկտոր-պրոֆեսորների պակաս չունի, դեռ ավելցուկ է:

Իհարկե, այդ «գիտնականների»՝ անգամ աշխատանքային լեզուն ժարգոնն է, իսկ ոմանց մոտ ակնհայտ է ուղեղի որոշ ֆունկցիաների անդառնալի կորուստը: Նաև փաստ է, որ որևէ երկրի իշխանության մեջ, թեկուզ 100 մարդու հաշվարկով, այդքան բանակում չծառայած և վայ-գիտնական չկա. և նման «ուսյալ-բանակից թռածների» թվով հաստատ տիեզերքում առաջատար ենք:

NEWSPRESS.am