Սպանված զինծառայողի դիմաց մեկը երեքին պատասխանելու մոտեցում ենք որդեգրել. Վիգեն Սարգսյան

Զզինծառայողների ծառայությունը փոքր-ինչ անվտանգ է դարձել:

Այս մասին այսօր «Հայաստան-Սփյուռք» 6-րդ համաժողովում ասաց ՀՀ պաշտպանության նախարար Վիգեն Սարգսյանը:

«Ապրիլյան պատերազմից հետո ամենամեծ փոփոխությունն այն է, որ առաջնագիծը որակապես փոխվել է ինժեներական սարքավորումների և տեսադիտարկման սարքերի ներդրման տեսակետից»,- ասաց նախարարը:

Նա նկատում է, որ սահմանին լինում են կրակոցներ, սակայն միևնույն ժամանակ նշում է, որ թշնամին ստանում է պատասխան կրակոցներ:

«Մեզ համար սկզբունքային է, որ ամեն սպանված զինծառայողի դիմաց մեկը երեքին պատասխանելու մոտեցում ենք որդեգրել: Իհարկե, դա մեզ չի սփոփում, դա չի բխում մեր քաղաքականությունից, բայց դա պատերազմների կանոններից է», – նշեց Վիգեն Սարգսյանը:

Նա տեղեկացրեց նաև, որ հաշմանդամություն ունեցող մի սփյուռքահայ պատրաստակամություն է հայտնել իր հաշվին կահավորել առաջնագծի 50 դիտակետ:

Նա նշեց, որ Ադրբեջանն ընտրել է մրցավազքի ճանապարհը, սակայն Հայաստանը ոչ թե քանակին քանակով հակադարձելու քաղաքականություն է վարում, այլ բավականին ադեկվատ միջոցներով է կազմակերպում սպառազինությունը:

«Ռազմական տեխնիկան և ռազմական գիտությունն այնքան արագ են զարգանում, որ ցանկացած բան, որը տեղադրում ես, արդեն ամիսներ անց մի քիչ հնացած է: Դրա արդիականը կա, դրա հակաթույնը կա, որին դու պետք է ևս հակաթույն մտածես, հետևաբար, մենք այստեղ ունենք և խորհրդատվության, և աջակցության կարիք»,- ասաց Վիգեն Սարգսյանը: