Գյումրու քաղաքապետարանի թողտվությամբ և մասնագետների ձեռամբ հատվել են այգու ծառերը (լուսանկարներ)

Ֆեյսբուքյան օգտատերից մեկն իր էջում հրապարակել է լուսանկարներ՝ հատված ծառերի բներով և գրառում կատարել, որում, մասնավորապես, նշված է եղել. «Սա Գյումրու «Բոշի սադն է»՝ Խաղաղության զբոսայգին, կտրված են մոտ 25-30 երիտասարդ ծառեր, չգիտեմ՝ ում ձեռքի գործն է. քաղաքապետարանի՞, թե՞ այլ վանդալների, համենայնդեպս քաղաքապետարանի ավանդական ծառահատմանը՝ խոր էտում կոչվածին նման չէ»,-գրել է օգտատերը: tsarer gyumri1

tsarer gyumri2

Պարզելու համար, թե ինչու են հատվել ծառերը՝ NEWSPRESS.am-ը կապ հաստատեց Գյումրու քաղաքապետի խոսնակ Սոնա Առաքելյանի հետ: Նախ նա ասաց, որ ճշտումներ անելուց հետո կզանգահարի՝ 10-15 րոպեից, ապա նշված ժամանակում կապ հաստատեց մեզ հետ:

Պարզվում է՝ ծառահատումներն իրականացվել են քաղաքապետարանի թողտվությամբ և մասնագետների ձեռամբ: Սոնա Առաքելյանի խոսքով՝ այդ ծառերը կտվել են գարնան էտի ժամանակ:

tsarer gyumri3 tsarer gyumri4

tsarer gyumri8

«Այս ծառերը հատվել են ապրիլին: Դուք չե՞ք տեսել, որ նկարներում բները թարմ չեն: Նկատվում են բարակ բնով ծառեր, որոնք ինքնաբուխ աճած են եղել և խանգարել են մայր ծառերին, հատվել են քաղաքապետարանի համապատասխան բաժնի աշխատակիցների կողմից: Համեմատաբար հաստ բնով ծառերը եղել են փտած և հիվանդ, որոնք ևս հատվել են մասնագետների կողմից»,-ասաց Սոնա Առաքելյանը:

tsarer gyumri7 tsarer gyumri6

Դիտարկմանը, թե, այնուամենայնիվ, որոշ բներ թարմ են, և պարզ երևում է նաև, որ դրանցից մի քանիսը չեն խանգարել մայր ծառերին՝ մամուլի խոսնակը հակադարձեց. «Ո՛չ, ո՛չ, մեր մասնագետները դրանք բոլորն ուսումնասիրել են և գտել են, որ պետք է հատվեն»,- նշեց Սոնա Առաքելյանը: