«Անկախության սերնդի» ձայնը՝ Րաֆֆու անվան դպրոցում (ֆոտո)

Հայոց պետականանության խորհդանիշ եռագույնի մուտքով ու Հայաստանի օրհներգով ազդարարվեց Երևանի Րաֆֆու անվան թիվ 36 հիմնական դպրոցում կազմակերպված միջոցառման սկիզբը: Այն նվիրված էր ՀՀ անկախության 26-րդ տարեդարձին: Անկախություն, որը հեշտ չի տրվել, որին հասել են հերոսների դիակների ու արյան վրայով: Այդ անկախությունը մենք նվաճել ենք կյանքի գնով:

Րաֆֆու անվան դպրոցը արցախյան պատերազմում տվել է 12 հերոս: Նրանց հիշատակը հավերժացնող հուշակոթողը կանգանած է դպրոցի բակում:

Դպրոցի տնօրեն Նունե Ղազարյանը, շնորհավորելով բոլորին անկախության օրվա առթիվ, իր խոնարհումը բերեց բոլոր այն մարդկանց, ովքեր իրենց կյանքի գնով պայքարել են նոր սերնդի ու Հայաստանի ապագայի համար։ Բոլորն ներկաներն իրենց հարգանքի տուրքը մատուցեցին հերոսներին՝ հավերժացնելով նրանց հիշատակը, իսկ առաջին դասարանցիները նաև ծաղիկներ դրեցին դպրոցի բակում տեղադրված հուշաքարին:

Դպրոցում իշխում էր եռագույնը՝ կապույտ, կարմիր և ծիրանագույն վզկապներ, փուչիկներ, դրոշներ և ժապավեններ: Միջոցառումը հագեցած էր նաև գեղարվեստական համարներով ու ելույթներով:

Դպրոցի տարրական դասարանների աշակերտները մասնակցեցին նաև թեմատիկ կավճանկար-մրցույթի: «Թող լինի միշտ արևը» խորագիրը կրող մրցույթում հաղթեցին առաջին դասարանցիները:

Օրվա առիթով բաց դաս էր կազմակերպել մաթեմատիկայի ուսուցչուհի Անահիտ Խնձրցյանը: Նա իններորդցիների հետ անցկացրեց «Տիեզերական լեզվի թվային բանալին հայոց այբուբենում» խորագրով դաս: «Թվերն են կարգավորում աշխարհը, քանի որ բոլոր գաղտնիքները թվերի մեջ են» կարգախոսով պարապունքի ընթացքում աշակերտներն օգտագործելով երկրաչափությունից կոորդինատական հարթության գաղափարը՝ ստացան Հայաստանի քարտեզը։ Կոորդինատային հարթությունը դարձել էր Հայաստանը, իսկ այդ հարթության կոորդինատը՝ Արցախը և Ստեփանակերտը։ ՀՀ քարտեզի հավաքումը գերազանց ստացվեց։

Հետաքրքիր մեկնաբանությամբ ներկայացվեց նաև Զվարթնոց տաճարը:

Մանկավարժն իր աշակերտներին բացատրեց այբուբենի թվային համակարգը և այն կապեց Մենդելեևի պարբերական աղյուսակի երկաթների շարքի հետ՝ հայոց այբուբենին տալով «երկաթագիր» անունը:

Ճանաչողական ու օրվան համահունչ հայրենասիրական տոնի մեջ կազմակերպված դասի համար ուսուցչուհուն շնորհակալություն հայտնեցին թե՛ մասնակից ծնողները, թե՛ դպրոցի ղեկավար կազմը:

Արմինե Մկրտումյան