Հակատուբերկուլոզային դիսպանսերի ղեկավարը բարեփոխումները խառնել է օպտիմալացման ու կրճատումների հետ

NEWSPRESS.am–ի խմբագրությունն ահազանգ է ստացել «Տուբերկուլոզի դեմ պայքարի ազգային կենտրոնի» մի շարք բուժաշխատողներից:

Բժշկական կենտրոնը, որը հայտնի է որպես Աբովյանի դիսպանսեր՝ Հանրապետությունում տուբերկուլոզի ախտորոշման և բուժման միակ կենտրոնն է:

Բուժաշխատողների խոսքով՝ երեք տարի առաջ կենտրոնի տնօրենի պաշտոնն ստանձնեց Արմեն Հայրապետյանն ու սկսեց, իր պատկերացմամբ, «բարեփոխումներ» կատարել: Վերջերս էլ «բարեփոխումների» այս շարքը համալրեց երկու բաժանմունքները միացնելու մասին նորությունը:

Բուժաշխատողները նշեցին, որ միանալու են Արտաթոքային բաժանմունքը (որը նախկինում կոչվել է ոսկրահոդային բաժանմունք) և թոքային վիրաբուժության բաժանմունքը:

Կենտրոնի աշխատողներն օպտիմալացման մասին խոսելիս՝ առանձնացնում են մի քանի բացասական կողմեր:

Նախ, նրանց խոսքով, սրանք երկու, լրիվ տարբեր գործառույթներ իրականացնող բաժանմունքներ են, որոնք միացնելու դեպքում արդեն աշխատանքի հետ կապված մի շարք խնդիրներ կառաջանան:

Արտաթոքային բաժանմունքն աշխատում է ավելի ծանր գրաֆիկով և, սովորաբար, այստեղ բավականին շատ հիվանդներ են լինում: Ինչ վերաբերում է թոքային վիրաբուժության բաժանմունքին, ապա այստեղ, թեև շատ չեն հիվանդները, սակայն նրանք սուր վարակակիրներ են, ովքեր հեշտությամբ կարող են վարակը փոխանցել մյուս բաժանմունքում բուժվող հիվանդներին:

Այս օպտիմալացման մասին Արտաթոքային բաժանմունքի վարիչ Լևոն Խալաթյանը նոր է իմացել: Նա NEWSPRESS.am-ի հետ զրույցում նշեց, որ արձակուրդից վերադարձավ, և իրեն «անակնկալ» մատուցեցին: Նա այս երկու բաժանմունքները միացնելը սխալ է համարում:

«Սա բարեփոխում չէ, ես սրա մեջ ոչ մի դրական բան չեմ տեսնում: Մեր բաժանմունքում հիվանդները շատ են, և ծանրաբեռնված ենք աշխատում, նրանց քանակը գնալով ավելանում է: Թոքայինը խառնել արտաթոքային բաժանմունքի՝ սխալ է: Բացի այդ, աշխատողներից վեցն են մնալու միայն: Մարդիկ, ովքեր երկար տարիներ աշխատում են և բավականին փորձառու մասնագետներ են, փաստորեն, զրկվելու են աշխատանքից»,– մեզ հետ զրույցում նկատեց բժիշկ Խալաթյանը:

Նա նշեց, որ մոտ 28 բուժաշխատողից մնալու է ընդամենը վեցը: Ինքը՝ Խալաթյանը, կրճատման տակ ընկնելու մտավախություն չունի: Բժիշկ Խալաթյանին այս պահին մտահոգում է բաժանմունքների ճակատագիրը. ի՞նչ կլինի հետո, երբ հիվանդներին միացնեն և մասնագետներին կրճատեն:

Տնօրենն իր հերթական «բարեփոխման» ծրագիրը ներկայացնելիս՝ հայտարարել է, թե սա կատարվում է նախարարության որոշմամբ:

Այս տեղեկությունն Առողջապահության նախարարությունից ո՛չ հաստատեցին, ո՛չ էլ հերքեցին: Նրանք հորդորեցին հարցն ուղարկել էլեկտրոնային փոստին, որից հետո կլինի նաև պատասխան:

Ամեն դեպքում NEWSPRESS.am-ը կփորձի հետևողական լինել խնդրին ու պարզել, թե որքանով է այս որոշման մեջ նախարարության «մատը խառը»: